Unsaon kaha sa paghimakak sa Moro Islamic Liberation Front karon nga migawas ang ebidensiya nga aduna diay kalambigitan ang international terrorist ug bombmaker nga si Marwan sa ilang organisasyon.
Kagahapon, gibutyag sa balita sa Philippine Star ang dokumento gikan sa United States District Court sa Northern District of California. Sa maong dokumento, gidetalye ni Marwan sa iyang emails ngadto sa iyang igsuon sa US kalabot sa iyang koneksiyon sa MILF ug sa mga drone nga maglupadlupad sa kapunawpunawan.
Ang maong dokumento magmatuod nga namakak diay si MILF chief negotiator Mogagher Iqbal nga wala sila’y kasayuran sa presensiya ni Marwan sa Mamasapano, Maguindanao.
Usa lamang kini sa mga butang nga gikalagotan sa mga magbabalaod ngadto sa mga sakop sa MILF tungod sa dili pagtug-an sa tinuod. Kun nakaako si Iqbal sa pagpamakak atubangan sa mga tawo atol sa Senate hearings nga gimonitor sa minilyon ka mga Pilipino, angay pa ba kitang motuo kaniya?
Dungan sa pagpanggawas sa mga tinuod nga estorya nga naglimin sa kamatayon sa 44 ka mga SAF commandos, misipa ang panawagan pagpakanaog kang Pres. Noynoy Aquino. Dili lang maayo pagka-handle sa mga grupo nga nanawagan pagpakanaog kang Noynoy dinhi sa Sugbo tungod kay wala ma-maayo og plano. Ang National Transformation Council nga gipanguluhan nilang kanhi Defense secretary Norberto Gonzales, kanhi senador Kit Tatad ug mga Obispo, mipabasa kang Archbishop Emeritus Ricardo Cardinal Vidal og "statement" pagpakanaog kang Noynoy, apan pagka-ugma gihimakak sa mga pari nga iya kadto sa Artsidyosesis sa Sugbo tungod kay igo lang gipabasa si Cardinal Vidal sa hinimo nang daan gikan sa NTC.
Aduna pay daghang interest groups nga nagtuyoktuyok karon ginamit ang Simbahang Katoliko Romano.
Akong awhag sa kaparian, pagbantay intawon kamo nga dili magamit sa personal agenda sa mga indibidwal o tapoktapok sa mga kuwestiyonableng tawo.
Ug taliwala ning mga isyu sa Mamasapano encounter, ang atong bise presidente nga si Jejomar Binay padayon ra gihapong namolitika. Wala ipaklaro sa iyang United Nationalist Alliance kun kang kinsa nga kuwarta kadtong tag-P100 mil matag pamilya sa 44 ka SAF commandos - sa bulsa ba ni Binay o sa panudlanan sa Makati?
Dinhi sa Sugbo, ang PAGIBIG Fund mi-sponsor og mass wedding. Akong pangutana, nganong naa man si Bise Presidente Binay sa maong mass wedding nga gi-sponsoran sa PAGIBIG?
Maayong utingkayon sa Commission on Audit ang kuwarta nga gigamit sa pagpang-apod-apod sa pamilya sa SAF commandos kun gitugot ba kini.
Apan samot nang utingkayon ang pundo nga gigamit pagpakasal sa gatusan ka paresan nga iya sa PAGIBIG nga gigamit sa sayo nga pamolitika ni Binay.