Ang buhok maoy depensa sa ulo nga dili madirekta nga madaut sa init o ulan. Nakadugang sad ni sa kaanindot sud-ongon ang atong panagway. Ang normal nga kolor sa buhok sagad itom o may pagkatsokolate nga itomon.
Samtang magkaedad ta, inanay usab mohinay ang lawas nato sa pagprodyus og 'melanin', nga kini maoy mopaitom sa atong buhok. Apan adunay tawo o bisan bata pa ang edad, namuti na. Unsa may hinungdan ini?
Matud sa mga eksperto, ilang gitumbok nga kalagmitan tungod kini sa;
*Kulang sa Bitamina-12 - Gikinahanglan ang igong pagkaon sa tuna o sardinas, salmon, karneng baka, itlog, keso, o gatas. Makatabang kini sa natural nga kolor itom sa buhok. Anaa sad ni sa 'Spirulina' ang bitamina-12.
*Kaliwat - kun unsay problema sa buhok sa atong mga ginikanan o mga kaliwatan, mapanunod usab kini kanato o bisan sa mosunod tang kaliwat.
*Subrang kahago sa pangutok - kanunay aburido sa panghunahuna og sulbad sa mga problema sa paningkamot ug sa mga gumonhap sa kinabuhi.
*Grabeng emosyon - ilabi na anaa permi nagpuot ang dughan sa kasakit, kaguol, kakulba, kabalaka, masuk-anon ug ubang negatibong pagbati.
*Grabeng konsumo - kanunay grabeng nakahigop og kape, tsa, mga lamas ug pagkaon og mga tambok o piniritong gikan sa mantika sa baboy.
*Epekto sa panambal - chemotherapy, pag-inom og isog nga tambal sama sa antibayotik ug uban mga kemikal nga makaapektar sa buhok.