Gipalutaw sa balita nga nakiggubat ang mga sakop sa Moro Islamic Liberation Front (MILF) batok sa mga sakop sa Bangsamoro Independent Freedom Fighters (BIFF) niadtong adlaw nga giihaw ang 44 ka sakop sa PNP Special Action Force.
Milutaw usab ang balita nga mga sakop sa MILF ang naghatag sa SAF og kasayoran sa nahimutangan sa terorista nga si Marwan .
Klaro ug tataw nga gituyo ang pagpagawas sa maong mga balita aron molurang ang kasuko ug kalagot sa katawhan ngadto sa MILF nga gikasabot karon sa gobiyerno ni Presidente Aquino alang sa kalinaw.
Apan bisan unsaon sa pagtabon, ang kamatuoran motuyhakaw g’yud ug ang bakak mobantang gayud tungod kay ang panghitabo nga nagpalibot sa mga balita magatug-an nga kini bakak.
Kun tinuod pa nga nakigpinusilay ang mga sakop sa MILF ngadto sa mga sakop sa Bangsamoro Independent Freedom Fighter, ug dili sa mga sakop sa SAF sa kapolisan, ngano’ng wala man dayon kini nila isulti ngadto sa katawhan?
Samot na g’yud nga makaingon kita nga gikingkoy lang ang gobiyerno sa MILF kun mapunta ngadto kanila ang lima ka milyon ka dolyar nga patong sa ulo sa terorista’ng si Marwan. Pangilad ngadto sa katawhan.
Mas maayo seguro’ng isugyot sa atong gobiyerno ngadto sa Amerika nga anhi sa kagamhanan sa Pilipinas ihatag ang patong nga salapi sa ulo sa terorista’ng napatay ug mao kini ang mobahin-bahin ngadto sa mga kabanay sa mga SAF nga namatay ug sa mga naluwas.