Hi Atty. Divine,
Maayong adlaw kanimo. Ako diay si Flor, nagpuyo sa Banawa, Cebu City. Ang ako’ng pangutana attorney kun unsaon namo pagpapahawa ang among mga ig-agaw nga nagpuyo sa among yuta sulod sa taas nga panahon. Amo man gud nahibaw-an attorney nga nagpa-abang sila sa ilang balay nga wala man gani mi nikolekta nila og abang sa yuta. Unsa ang imong ikatambag namo attorney aron malamdagan ang among huna-huna. - Flor
Dear Flor,
Ang una ninyo’ng buhaton mao ang pagpadala og demand letter sa inyo’ng mga paryente nga nagmando kanila sa pagpahawa kay inyo na’ng gamiton ang maong property. Kun dili sila mopahawa bisan pa sa inyo’ng pagpadala og demand letter ug paghatag kanila og tagal sa pagbakante sa luna, mahimo kamo nga modangop sa barangay diin mahisakop ang yuta ug adto sila ninyo ireklamo aron kamo magkaatubang ug inyo’ng masulti kanila ang tinguha ninyo sa pagpabakante sa maong luna. Kun dili mo mahusay sa barangay, mapugos g’yud kamo sa pagdangop sa korte alang sa pagpasaka og kaso aron ang korte na ang mopapahawa kanila kun inyo’ng mapamatud-an nga wa silay katungod nga mopuyo sa maong luna. Hinaut nga akong natubag ang imong pangutana. - Atty. Divine
Alang sa inyo’ng pangutana may kalabutan sa problema’ng legal, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyo’ng pangutana pinaagi sa akong column matag Miyerkules ug Domingo.