Wala’y mga tawo nga misupak sa gisugyot nga ordinansahon ni Konsehal Gerardo Carillo nga magpugos sa mga tagdumala og balay-patigayon nga ang 10 % sa ilang mga kawani kinahanglan nga mga senior citizens.
Lipaya sa mga senior citizens niini’ng mao nga ordinansahon ni Carillo kana kun kaaprobahan. Tan-aw nako niini’ng Carillo bisan unsa na lang ang iyang mahuna-hunaan nga ordinansa basta makakuha’g suporta.
Sa miagi’ng tuig, gisugyot usab ni Carillo ug naaprobahan g’yud ang ordinansa nga magpahatag og ‘tag P5 mil sa mata’g “single parent.” Nakasugat og kontrobersiya ang mao nga ordinansa.
Ang problema lang kay unsaon pagpatuman nga wala may budget alang sa mao nga programa. Gibutang man niya nga ang makapahimulos sa ‘tag P5 mil mao kadto’ng mga single parent nga nakabotar na sa miagi’ng tulo ka eleksyon.
Diha ‘say sugyot ni Carillo kaniadto nga ang mga senior citizen nga moabot sa pangedaron nga 100, gantihan og P1 ka milyon. Wala siya magmalampuson pagkumbinsir sa iyang kaubanan sa konseho nga uyonan ang mao nga sugyot.
Nakasabot ko ngano nga ingon niini si Carillo. Gawas nga gusto tingali siya nga mutabang, nangambisyon si Carillo nga mahimo’ng kongresista diha sa south district.
Gani duna nay gipalutaw nga CK, kon Carillo sa Kongreso.
* * *
Apan ang paghatag og trabaho sa mga senior citizens, usa ka maayo nga lakang. Duna lang hinuo’y baruganan ang uban nga mga magpapatigayon.
Sama pananglit sa mga balay-patigayon nga ang serbisyo mao ang pagmasahe sa ilang mga kliyente. May kusog pa kaha si Lolo ug Lola nga momasahe?
Pananglit mga kan-anan, makadali-dali pa kaha sa paglihok sila si Lolo ug Lola? Dili kaha hinuon magpangikog ta nga mosugo sa mga waiter nga Lolo ug Lola nga hiposon ang mga kinan-an aron makabanos kita sa lamesa?
Kini maoy mga punto nga angay nga ikonsiderar.
* * *
Alang kanako, sayop si Mayor Michael Rama nga wala siya molaban sa polis nga nakapalag og kontrobersiya sa grupo ni Masbate Governor Rizalina Seachon Lañete atol sa Sinulog Grand Parade adto’ng Domingo.
Igo lang tawon nagtuman si SPO1 Arthur Sabang sa gitahas kanila nga bantayan pag-ayo nga walay mga “unauthorized persons” nga makasulod diha sa Cebu City Sports Center.
Unsaon gud, ang grupo nila ni Lañete wala man mokuyog sa ilang dancing contingents ang Tribu Placernon. Igo ra man sila nga mobagat kun mosulod na sa sports center.
Dili magpasabot nga dili sila pasudlon, apan nagpahibalo unta sila daan nga sila mga kauban sa contingents aron wala’y problema.