Dear Atty. Divine,
Ang akong bana tua nagtrabaho sa gawas ug tulo ka tuig na nga wa mouli dinhi sa Pilipinas. Dili sab kini regular nga mopadala namo og kwarta hinungdan nga usahay magkalisud g’yud ko ilabi na kun ting-exam na sa among duha ka anak.
Karong bag-o duna mi silingan nga kauban sa trabaho sa akong bana nga mitug-an nga may ka live-in nga Pinay ang akong bana didto sa gawas ug gani nagplano na kini’ng magpakasal sila didto. Ang akong pangutana attorney nga kun magpakasal og usab ang akong bana didto sa Europe bisan kun minyo siya dinhi sa Pilipinas mahimo ba nako siya’ng ikiha og bigamy? Unsa may angayan nako nga buhaton aron mahatagan og leksyon ang akong bana sa iyang gibuhat kanamo? Daghang salamat sa imong tambag.-Lydia
* * *
Dear Lydia,
Kun mahitabo nga magpakasal ang imong bana sa iyang babaye didto sa gawas sa nasud maglisud ka sa pagkiha kaniya og bigamy kay wa man kini mahitabo dinhi sa teritoryo sa Pilipinas busa wa kita’y jurisdiction niini gawas lang kun dinhi sila sa Pilipinas magpakasal kay ang jurisdiction sa criminal case kun diin mahitabo ang krimen.
Apan kun pananglitan sila’ng duha mamauli sa Pilipinas ug makakuha ka og ebidensya nga sila nagpuyo dinhi, mahimo na nimo nga ikiha sila’ng duha og Concubinage nga usa ka criminal case base sa Revised Penal Code ug hayan mahimo sila’ng mabilanggo kun mapamatud an. - Atty. Divine
* * *
Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa flores_divina@ yahoo.com og akong tubagon ang inyong pangutana pinaagi sa akong column matag Miyerkules og Domingo.