Haum kaayo ang ikaduha nga andana sa Ramos Supermarket nga anha ipahimutang ang opisina sa City Traffic Operations Management. Ang merkado gilibotan og lapad kaayo nga karsada nga mahimo’ng anha maka-parking ang mga sakyanan.
Dili sama didto sa nahimutangan sa CITOM building sa Natalio Bacalso Avenue nga apiki kaayo sa lugar nga maka-parking ang mga sakyanan sa CITOM ug sa mga tawo nga mo-transact og business.
Gipabalhin ni Mayor Michael Rama ang CITOM ngadto sa Ramos Supermarket building aron nga ang ilang mga opisina himuon nga kabahin sa Cebu City Medical Center sa tumong nga mosaka ang iyang category sa Department of Health (DOH).
Kapin sa 20 ka tuig na ang nakalabay, ang traffic division sa kapolisan sa dakbayan diha kaniadto magbase sa karaang Ramos Supermarket building. Nasentro ang mao nga dapit sa dakbayan ug sayon ra ang pag-responde kun adunay mga alarma.
Daghang maayo nga angay’ng himuon aron monindot ang serbisyo sa dakbayan apan ang nakadaot kay pipila ra sa mga opisyal ang naghuna-huna. Niini’ng gihimo ni Mayor Rama, tabla ra nga duha ka langgam ang iyang naigo pinaagi lang sa usa ka bala.