Gibisitahan ni Vice President Jejomar Binay ang mga lungsod sa Dumanjug, Sibonga ug Ronda kagahapon. Ang tulo ka dapit maoy grabe nga nakaangkon og kadaot sa bagyo’ng Seniang.
Sa Ronda, nanghatag si Binay og ‘tag P10 mil niadto’ng mga pamilya kang kansang kabalayan gibanlas g’yud sa baha, ug ‘tag P5 mil sa mga pamilya nga igo lang nagub-an og balay.
Samtang nangalipay ang gipanghatagan, sigurado nga nagmahay usab kadto’ng mga mag-uuma nga nangamatay ang mga tanom tungod sa bagyo apan wala maapil sa paghatag.
Laing mihangop sa pagbisita ni Binay mao kadto’ng mga tawo nga nakaapil sa Boodle Fight, ang pagkaon sa paniudto nga nagkinamot lang.
Ang tukma nga himuon ni Binay kun tinuod man gayud siya nga gusto’ng mutabang sa mga biktima sa bagyo mao ang pagpaninguha nga mopaspas ang “relief operations” sa mga ahensya sa kagamhanan diha sa mao nga mga dapit.
Kun adunay hinabang-salapi nga ipanghatag dili na kinahanglan nga si Binay pa maoy personal nga motunol aron dili mahulagway nga usa lang kini ka pagpamolitika.
Ang pangutana, makalimot kaha ang katawhan sa anomaliya nga gipasangil kaniya nga hangtud karon wala pa niya tubaga?