Ang natural nga tambal

Matud pa sa mga sayantis, bulahan kuno kita kay ania sa atong nasud ang daghan tanom nga kahinguhaan isip tambal. Gikalkulo nilang nikabat na ngadto sa 1200 ka klase sa tanom ang ilang nadiskubre. Og gani, 200 pa ang nasulayan na nila, nga kini makatambal gayud sa nagkalainlaing mga sakit. Wala pa kaayo kita maedukar aning klaseha sa panambal. Ang tibuok kalibutan, karon nahigmata na sa ka impresibo o kaepektibo ining natural nga medisina nga walay sayd-epek. Ang problema unsaon pag-ila niini nga kining tanoma mahimong magamit nga tambal. Aniay sugyot nga atong buhaton.

*TAN-AWA - sud-onga pag-ayo kun unsay porma o katibuk-ang dagway sa tanom aron dali nimo kini matiman-an o mailhan.

Sa tanom, kumosa ang dahon unya simhota kini ingon man ang duga ini, nga lanahon o halangon timailhan kining tambal sa hilanat, ubo, sip-on. Sama sa lagundi, luy-a, kalabo, lemon.

*TILAWI - pinaagi sa pagtilaw sa dahon, gamut, o ubang parte ini, kun medyo apod o asgad, adunay ‘pectin o tannin’ kini nga makaayo sa kalibang ug sakit sa lagos. Sama sa bayabas, lomboy, mangosteen, etc. Kun pait, aduna ni ‘alkaloids’ makaayo sa sakit ngipon, tiyan, regla. Sama sa kipikipi, dapdap, gabo, etc. Mga liso mayo sa purge sama sa ipil-ipil, lansones, kalbasa.

*HIKAPA - pinaagi sa paghikap o paghinolhinol sa mga dahon kun medyo balhiboon, haiton, hamison, nipison o bagaon, aduna kanay birtud isip tambal.

Sagad sa mga sagbot aduna nay ‘potassium’ nga makatabang sa kidneys, hayblad, sama sa kogon, tangad, etc. Busa mas maayo magkat-on kita niini.