Nakugang ‘ta sa miagi’ng semana. Susama’ng batan-on nga babaye nga nalambigit sa wa’ pagbayad sa resort nga iyang gipuy-an.
Sama’ng babaye ang gipasanginlan kaniadto nga wa’ usab mobayad sa mga senina nga iyang gikuha sa usa ka tindahan. Karon nabutang sa lain na ‘sab nga isyu ang batan-on.
Gawas sa lawak nga wa’ niya bayri, giingong wala ‘sab siya mobayad sa pagkaon ug uban pa nga iyang nagamit sa maong resort. Nidani sa atensyon ang batan-on di’ lang tungod sa iyang edad, apan tungod sa iyang kaanyag.
Wa’y makatuo nga ang sama ka maanyag nga batan-on adunay tinagoan nga di’ maayo. Kana kun atong tuohan ang mga pasangil batok niya.
Desido ang tag-iya sa resort nga mopasaka og kaso. Iya ning katungod nga angay nga respetuhon. Adunay uban nga dili motuo nga menor de-edad pa ang maanyag.
Apan kun ang batan-on ang pasultihon, menor de-edad pa siya ug nga di’ sayon-sayon nga makasohan. Tinuod man, nituo niya ang gobiyerno ug gani ang DSWD ang nikustodiya kaniya.
Apan sa di’ pa hingpit nga husgahan ang maong batan-on, angay tan-awon nga adunay mga butang o isyu nga angay hatagan og mas lawom nga pagsabot.
Di’ kini ang una’ng kaso nga adunay mga batan-on nga nalambigit sa pagpangawat. Nahatagan lang og gibug-aton ang iyang kaso tungod sa kaanyag sa maong batan-ong suspek.
Apan matag adlaw, nagkataas ang kaso sa mga batan-on nga nalambigit sa pagpangawat. Gikan sa pagpanguha og butang sa ilang silingan hangtud na sa mga menor de-edad nga wa’y kalainan sa nanulis sa ilang pagpanaygon diha sa mga PUJ.
Sila ang mga batan-on nga hatagan og mas lawom ug lapad nga pagtagad tungod kay anaa nila nagsandig ang kaugmaon sa atong kalibutan.
Kun susamang mga batan-on ang modaghan sa mga mosunod nga katuigan, wa’y rason nga di’ ‘ta mabalaka nga mas magkadaghan pa ang mga tawo sa gobiyerno nga malambigit sa kurapsyon ug mas daghang batan-on ang mopili nga mangilad ug mangawkaw itandi sa pagtungha ug pagtrabaho sa disenteng paagi.
Usa lang ang kaso sa maong batan-ong babaye apan kun tan-awon ang problema sa mga menor de-edad nga nalambigit sa pagpangawat mas pa nga seryoso’ng problema ang gi-atubang sa uban.
Panahon na aron hatagan og tukma’ng solusyon ang maong problema sa mga ‘kawatan nga batan-on’ tungod kay usa ni ka kamatuoran nga resulta sa unsa nga matang sa sosyedad ang ilang gidak-an ug unsa nga matang sila nga pamilya.
* * *
Email: ricolucena@yahoo.com or ricolucena@ilovecomarts.com