Dear Atty. Divine,
Duna ko’y problema labot sa yuta nga akong napalit apan wala pay Deed of Absolute Sale. Ako ni’ng napalit pinaagi sa installment ug nabayran na nako tanan last month. Gusto na unta nako nga ibalhin sa akong pangalan apan ang ako karong gikuptan nga dokumento Deed of Conditional Sale ra man. Ang nagbaligya nako aning yutaa tua na karon sa Mindanao. Unsa may maayo nako nga buhaton karon aron mabalhin na sa akong ngalan ang maong yuta. Mahimo ba nako nga gamiton ang Deed of Conditional Sale sa pag-transfer? - Francing
* * *
Dear Francing,
Aron imong masugdan ang proseso sa pag-transfer sa maong yuta ngadto sa imong ngalan, ang una nimo’ng buhaton mao ang pagpahimo og Deed of Absolute Sale ug imo kini’ng papirmahan sa nagbaligya sa yuta ug panotaryuhan. Kana’ng imong gikuptan nga Deed of Conditional Sale dili na nimo magamit nga dokumento pag-transfer sa maong property. Ang BIR mangayo g’yud og notarized Deed of Absolute Sale ug human sa imong pagpanotaryo niini imo kining i-submit sa BIR alang sa pagbayad og buhis ug kun mogawas na ang Certificate Authorizing Registration kon CAR sa BIR mahimo na nimo’ng i-process ang pagbalhin sa tax declaration ug sa titulo niini ngadto sa imong pangalan. – Atty Divine
* * *
Kun ikaw dunay pangutana ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules og Domingo.