Walay gasto ang dakbayan sa Sugbo sa pagpahimo og dagko nga estatuwa’ng bronse nila ni Don Vicente Rama ug Serging Osmeña nga gipabarug na atubangan sa Cebu City Hall.
Giuyonan sa kadagkoan sa Insular Life Assurance Company ang hangyo ni Mayor Michael Rama nga himoan og estatuwa sila si Don Vicente ug Serging agi og pagpasidungog kanila.
Si Don Vicente apohan ni Mayor Rama samtang si Serging amahan ni kanhi kongresista Tomas R. Osmeña. Daygon nato ang insurance company kay tiaw mo, dul-an kuno sa P3 milyones ang gasto pagpahimo sa duha ka estatuwa nga bronse.
Mikuha pa kini og ilado kaayo nga tighimo og mga estatuwa dinhi sa nasud. Para kanako, taas kaayo ko og ekspektasyon. Kay ilado ug mahalon nga tighimo og estatuwa ang gihimo, angay g’yud unta nga masundog gayud ang dagway sa tawo nga iyang gihimoan og estatuwa.
Apan pastilan, layo ra g’yud kaayo sa tinuod ang estatuwa ni Serging. Dili kini pagpanaway ang ako nga aron dauton ang naghimo sa estatuwa. Mao gani nga dili nako ibutang ang iyang ngalan.
Daghan mi nga nagtan-aw sa estatuwa ni Serging ug pareho kami og baruganan nga layo ra’s tinuod ang dagway sa estatuwa. Dili ba sama sa estatuwa ni Dr. Jose Rizal nga kun makakita ka, bisan og walay ngalan imo dayon nga mahibaw-an.
Kana’ng estatuwa nga gipabarog sa atubangan sa City Hall, kun kuhaan nimo’s ngalan, unya mangutana ka sa mga tawo nga bisan suod kaayo’ng Serging kaniadto, sigurado ko nga dili sila makaila.
Sinati kaayo nako ang dagway ni Serging kay ang akong amahan kaniadto, dumadapig g’yud ni Serging ug matag eleksyon duna siya’y hulagway sa mga propaganda nga dad-on sa among balay. Unya, sa kamoderno na karon sa panahon, sayon ra nimo nga makita sa internet ang hulagway sa mga ilado kaayo’ng tawo sa katilingban, apil na kadto’ng mga patay na sama ni Serging.
Ang tukma unta mao nga sa dili pa ipabarug ang estatuwa, sud-ongon g’yud unta pag-ayo kun mao ba kini ang panagway sa tawo nga gihimoan og estatuwa.
Apan ang isyu karon kay hinatag ra man gud ang mao nga mga estatuwa? Ang pangutana, angay ba nga ipabarog nato ang estatuwa bisan kun dili kini kopya sa dagway sa mao nga tawo?
Kang Don Vicente, dili kaayo nako kabisado ang iyang hulagway kay pagsikat niya kaniadto, gamay pa akong bata.