Ang tradisyon nga kabilin sa atong katigulangan, adunay kahulogan nga gipatuo kanato mahitungod sa dili ordinary nga porma sa dalunggan o dunggan sa tawo.
Aduna kini interpretasyon nga naghulagway sa birtud sa pagkatawo. Tingali nakakita na kita’g tawo nga sungogon lang tawon nga ilang tawgon ug tangkag, lobo, paypay ug uban pa, depende sa nakitang porma niini.
May posibilidad ang mga eksperto niini, adunay gihimong sayantipikong enterpretasyon sa birtud sa talagsaong dunggan. Matud pa, subrang gidak-on ug ang porma niini, may mga lainlaing kahulogan. Bisa’g unsay gidak-on o porma niini, naghatag ni’g dakong kapuslanan sa tawo. Kay ang dunggan nato, nagsilbi kining ‘human radar’ nga modakop sa mga ‘sound o audio waves’.
Aduna ni kapasidad sa paghubad sa paningog, panungog ug pagdetek sa makabungol nga kahilom. Mura ni siya og ‘Astral o GPS satellite’ nga naglibot sa kawanangan pagdakop og situwasyon, impormasyon, ug ubang detalye nga kalihokan sa atong kalibutan ug ubang planeta ubos sa ‘solar system’.
Matud pa, kadtong tawong may talagsaong dunggan, mapaypay o matangkag man, usa kini ka intelihente, maayo sa tanang praktikal ug lohikal, nga maayo sa diskarte o pamaagi sa gugma, panguwarta, masinanduroton ug positibo’g panghunahuna ug kinaiya. Mora kini’g taghapan may katinuoran.
Segun sa aktuwal nga akong nasinati sa mga hingtungdan, sila adunay maayong birtud sa pagkatawo nga angayan sagupon imbis atong tamayon.
Sulaye pag-obserbar, kun dili man tanan pero kalab-anan,mao gyud sila sa atong paghulagway sa ilang kalihokan, nga dunay nindot nga kapalaran.
Busa, higalaon nato, basi’g may matabang kining kaayohan sa kinabuhi.