Mas maglisod na ron si Bise Presidente Jejomar Binay pagpadayon pag-isnab sa imbestigasyon sa Senate Blue Ribbon subcommittee sa mga pasangil sa pangurakot batok niya ug sa iyang pamilya. Siya ang labing maglisod sa pagsalikway sa nasudnong survey nga nagpakita nga mayoriya sa katawhan gustong manubag siya sa mga pangutana sa mga senador ug sa saksi sa giingong ilegal nga mga transaksiyon nga iyang gisudlan.
Kay sa tanang politiko, si Binay ang labing nakapahimus sa surveys sa niaging upat ka tuig: Kanus-a gipakita sa Social Weather Stations (SWS) ug Pulse Asia nga siya ang labing popular ug labing kasaligan nga opisyal sa gobiyerno.
* * *
Di masalikway ni Binay ang resulta sa labing uwahing survey sa SWS nga 79%, o walo sa matag napu, sa mga Pilipinhon ang pabor nga mosanong siya sa gisublisubli nang imbitasyon sa subcommittee nga gipangulohan ni Senador Koko Pimentel. Kay ang paghimo sa ingon mao say pagsalikway sa nangaging surveys sa SWS ug Pulse Asia nga siya ang labing dumadaog sa posibleng mga kandidato pagka presidente.
Di mahimong kuwestiyunon ni Binay ang survey sa SWS dayong tapos niadtong Septiyembre sa way pagkuwestiyon sa surveys matag tulo ka buwan sukad niadtong 2010 nga nagpakita nga dako kaayong iyang labaw sa ratings sa posible niyang mga kaatbang, apil nang Presidente Noynoy Aquino.
* * *
Mas sayon nga kapilian ni Binay ang pag-atubang sa Senado. Bisan sa iyang kabalaka, nga may abundang sukaranan, nga labhan ug bugalbugalan lang siya sa mga senador nga silang Alan Peter Cayetano, Antonio Trillanes IV ug Pimentel.
May sukaranan sab hinuon ang panghinaot sa iyang mga dumadapig nga kun di makiangayon ang pagpaminaw sa mga senador ni Binay, mamahimo siyang martir. Ug mas modako ang simpatiya nga makuha gikan sa kinabag-an sa katawhan. Labing dakong tinubdan sa kahadlok ni Binay mao ang kahigayonan nga ang bisan unsa niyang itubag sa mga pasangil makapasamot lang sa kalawom sa gahong nga iyang nahimutangan.
* * *
Maong mangahag mi og sugyot: Masegurong epektibo ang pag-atubang ni Binay sa mga senador kun ang tanan niyang tubag sa ilang pangutana pulos pasiunhan sa pahinumdom nga ilong tuwapos siya, nga iya nang uyoan ang nagpa-eskuyla niya ug nga isog siyang abogado nga wa magpabayad paglaban sa mga biktima sa diktadura ni Ferdinand Marcos.
Di sab makadaot kun butangan ni Binay og labing menos usa ka “po” ug usa ka “Your Honor” ang matag sentence. Mas daghan, mas maayo. Pananglitan, kun pangutan-on siya bay tag-iya sa 350 ka ektaryang asyenda sa Rosario, Batangas, mao ni labing maayong tubag. “Your Honor, please, ako po ay ulila sa Makati, tiyuhin ko po ang nagpa-aral sa akin, kaya imposible pong magmamay-ari ako ng asyenda, Your Honor, po.”