Samtang naglakaw pauli na unta sa ilang balay, wala magdahom ang tindera sa usa ka dako’ng department store kuyog ang iyang uyab nga adunay dautang mahitabo kanila.
Sa padayon nila’ng paglakaw, takulahaw lang ilang gikasugat ang tulo ka nilalang nga ilang gituohan nga tawo, apan diay mga demonyo.
Ang manag-uyab gitulis ug ang babaye gitabangan paglugos. Ang naghimo sa krimen nga nadakpan sa kapolisan giingong mga adik-adik.
Ang kasinatian sa manag-uyab dili basta-basta ilabi na gayud sa babaye nga gitabangan og lugos sa tulo ka demonyo atubangan sa iyang uyab.
Sigun sa taho, human tulisa ang mag-uyab, gipangutana sa mga tulisan ang mga biktima kun mag-uyab ba sila ug sila mitangdo.
Apan ang ilang pagtangdo sinyales na diay kini sa mas dautan pa’ng mahitabo kanila sa mga kamot sa mga demonyo.
Human masayri nga manag-uyab ang duha, ang mga demonyo’ng tulisan mimando sa mga biktima sa paghubo sa ilang mga sapot ug sa pag- sex sa ilang atubangan, apan namalibad ang mga biktima.
Tungod kay nagdumili sa ipabuhat kanila, ang mga tulisan mipuli-puli paglugos sa babaye samtang ang iyang uyab walay nahimo nga nagtan-aw lang sa gihimo sa mga demonyo.
Ang mga naghimo sa ingon dili na tawo kay ang mga tarong nga tawo dili man makahimo niini. Ang mga naghimo sa ingon dili gani makonsiderar nga mananap o hayop tungod kay mas buotan pa kanila ang mga hayop.
Ang mga naghimo sa ingon mga demonyo ug mga ulipon ni satanas ug ang naghimo kanilang mga demonyo ug ulipon ni satanas mao ang ginadili’ng drugas.