Duna na say laing opisyal sa gobiyerno ang natangtang tungod sa kalambigitan niini sa gibansagang “pork barrel” scam mastermind nga si Janet Lim Napoles. Siya si kanhi Sandiganbayan Associate Justice Gregory Ong.
Ang nakapakurat niini, sakop siya sa Sandiganbayan, ang dangpanan unta sa katawhan aron mangita og hustisya batok sa mga tawong anaa sa pwesto nga nag-abusar sa ilang gahom pinaagi sa pagpangawkaw sa panudlanan sa katawhan.
Si Ong gihuboan sa iyang posisyon ug tanang benepisyo nga unta iyang madawat ini og retiro niya sa gobiyerno. Pagkaanogon sa pila ka tuig niyang paghago aron makab-ot ang maong katungdanan apan tungod sa pakig-estorya lang niini kang Napoles napapas ang tanan.
Ang pasangil batok ni Ong mao ang pakig-estorya niya kang Napoles tunga-tunga sa paghusay sa kasong kurapsyon mahitungod sa pagpalit sa mga peke nga Kevlar Helmets alang sa Philippine Marines sa militar nga diin gipakawalay sala si Napoles.
Apan napamatud-an sa Korte Suprema nga dunay panagkunsabohay nga nahitabo tali kang Napoles ug Ong sa maong kaso. Nakahimo siya og ‘gross misconduct, dishonesty ug impropriety.
Salamat sa makadaghang higayon nga na ‘special mention’ si Ong sa mga whistleblowers tunga-tunga sa mga paghusay kontrobersiya sa pork barrel scam diha sa Senate Blue Ribbon Committee.
Daan nang nanganti si Napoles nga dili siya basta matandog tungod kay aduna siyay mga koneksyon nga mga tag-as nga opisyal sa gobiyerno. Apan karon, hinay-hinay nang nahuboan sa ilang takoban ang maong mga opisyal.
Duna pay laing “Ong” sa gobiyerno. Mga opisyal nga dunay giprotektahang mga kawatan sa gobiyerno. Kinahanglang ma-expose sila ug matangtang sa ilang katungdanan. Kini aron usab dili na sila makapanakod pa sa ubang tarong nga nanerbisyo.