Sa wala pa ko magsugod pagsuwat niini’ng akong lindog karon, gipiyong nako ang akong mga mata ug gihuna-huna pag-ayo kun asa man moagi ang bul-og sa tubig nga matigom diha sa downtown area kun mag-uwan.
Akong naaninaw nga ang tubig anha ra g’yud mopaingon sa gitawag og Parian Creek nga ang tumoy nga bahin niini miabot diha sa unahan nga bahin sa Colonade Mall habig na sa Legaspi ug V. Gullas.
Kadto’ng mga dili kaayo suheto, wala g’yud masayud nga aduna diay sapa diha’ng dapita. Kay kun mosulod ka sa mao nga mall, wala ka may maagian nga sapa.
Ang gitawag og Parian Creek mao ang sapa nga ang bukana anaa duol sa Pier 3. Naa kini mag-agi kilid sa Military Support Point-7 sa Arellano Boulevard.
Pag-abot sa tumoy sa sapa diri sa downtown area, dunay mora’g sanga niini nga gikan sa dalan Junquera ug Sanciangko dapit sa Barangay Kamagayan.
Awhagon nako si Mayor Rama nga gahinan niya kini og oras ang pag-inspection sa mao nga sapa aron siya makahimo og diha-diha nga mando sa iyang mga sakop.
Kinahanglan g’yud unta nga panggub-on ang mga gipangtukod nga nakapagamay sa sapa. Tan-awa ra gud kanang taytayan sa dalan Mabini nga anaa mag-agi ang Parian Creek, klaro kaayo nga ang balay miabot na sa tunga sa sapa base sa barandilya sa taytayan.
Ang silong nga bahin sa balay gihimong barber shop kon tupihanan. Base sa gihimo nga taytayan nagpasabot nga lapad ang sapa kaniadto apan migamay na lang tungod sa kahakog sa mga tawo nga misibog sa ilang kabalayan ngadto sa sapa.
Basin og mahibulong kamo kun nganong kanunay nako nga gihisgotan kining mao nga isyu. Apektado man gud kaayo ang daghang mga tawo kun maglunop na kining mga dapita tungod sa pagsuyla sa tubig sa sapa.
Kami diri sa The Freeman kanunay lang intawon nga pangulbaan sa matag higayon nga mobunok na ang kusog nga uwan. Taga tuhod ang tubig-baha nga mosanap sa karsada atubangan sa among opisina.
Kun ibalik ang naandan nga gidak-on sa sapa unya atimanon kanunay pinaagi sa pagkuha sa mga lapok nga mahabilin kun adunay baha, tingali mopaspas ang pag-agas sa tubig ngadto sa dagat ug dili na makalunop.
Apan mao lagi, magkinahanglan kini og hugot nga baruganan. Aw hinuon, si Mayor Rama nakapakita na man sa iyang political will pinaagi sa paghawan sa gubot kaayo nga Barangay Kamagayan.