May problema ang magtiayon nga pulos inhinyero. Nagpabunyag sila pagka Muslim. Nagpakasal sila ubos sa mga lagda sa Islam. Apan ang bana gikiha sa iyang asawa. Maong nidangop sila sa National Commission on Muslim Filipinos (NCMF) nga may sanga nga buhatan sa Dakbayan sa Sugbo. Masaligon nga ang ilang bag-ong relihiyon makabaraw sa giisip nila nga pagpanghasi.
Nakugang ang lokal nga kadagkoan sa NCMF sa ilang pagsubli sa mga dokumento sa bag-o nilang mga sakop: Nagpabunyag ug nagpakasal sila isip mga Muslim sa usa lang ka adlaw--ang bunyag sa buntag gisundan sa kasal sa hapon--ug tulo ka tuig na ang ilang anak.
* * *
“Pagbuwag mo aron di mangapriso,” mao ni tambag nga ilang nadawat gikan ni Aurangzeb Ali, Socio Economic Division Chief sa NCMF sa Kabisay-an, kinsa nitumbok sa mosunod nila nga kalapasan:
Klaro nga nagpadalidali lang sila og pabunyag ug pakasal isip mga Muslim human nahibaw-an sa orihinal nga asawa sa lalaki ang ilang relasyon;
Ang relasyon sa bag-ong magtiayon nga namunga na og bata klarong nagsugod sa wa pa sila magpabunyag ug magpakasal isip mga Muslim; ug
Usa sa labing mahinungdanon nga mga lagda sa pagdawat sa mga magpabunyag sa pagka Muslim mao nga wa silay mayatakan nga mga katungod sa mga Kristohanon.
* * *
Nabalaka ang pipila ka Sugbuanong aplikante pagka polis nga mahagbong sila sa entrance examination. Nakadungog sila nga dako ang bentaha sa Muslim nga mga aplikante. Kay patongan og 5-10 puntos ang ilang grado sa pasulit aron pagpalambo sa ilang kahigayonan nga makatrabaho.
Nagdalidali sila og pabunyag. Tuod man, nakapasar sila ug nahimong mga polis. Nabisto ang ilang binuang dihang gitapok ni Heneral Rolando Garcia, kanhi direktor sa Police Regional Office (PRO) 7, ang tanang Muslim nga polis sa Kampo Sergio Osmeña Sr. Pipila nila nasakpang hubog ug may mga kuwentas sa ubang relihiyon. Gikasab-an silang Garcia nga di tinuod nga mga Muslim ug nga nagpakauwaw lang sa giabusohan nilang relihiyon.
* * *
Ang mga nahisgutan sa ibabaw ug uban pang pangabuso kabahin sa mga hinungdan nga (1) gihigpitan sa NCMF ang pagluwat sa Certificate of Tribal Membership (CTM) sa bag-ong magpabunyag nga mga Muslim ug (2) gihunong sa National Police Commission (Napolcom) ang pribilehiyo sa mga aplikanteng Muslim.
Niangkon hinuon si Acting Director Alexander Minalang sa NCMF nga nagpadayong mga binuang. Kay di ubos nila ang mga Imam (magtutudlo) nga mobunyag ug mokasal sa bag-ong mga Muslim. Molusad ang NCMF og kampanya sa edukasyon nga ang paggakos sa Islam di duwaduwa. Ni lutsanan sa mga problema sa kaminyuon ug ubang bulilyaso. Nipasidaan ang NCMF nga di nila duphan ang mga nagtuong ang pagpaka aron ingnong Muslim maoy labing sayon nga panagang sa mga kaso.