Sagunson ang lungkab o tulis sa nagkalainlaing lugar ug establisimiyento. Makaingon gayud kita nga migara man ang mga kawatan karong panahona.
Daghang posible nga rason kon ngano nagsunod sunod ang kawat. Usa niini mao nga lisod gayud ang panginabuhi karon mao nga ang ubang tawo, makahunahuna na lang og pangawat. Mahal ang mga palaliton, gamay ang suweldo, lisod mangita og trabaho.
Dili solusyon ang pagpangawat apan duna man gayud mga tawo nga gusto og sayon, mao na nga mangawat na lang.
Apan gawas sa tumang kalisod sa kadaghanan nga wa nay laing kapaingnan kon dili ang pagpangawat, usa usab ka posible nga rason nganong migara ang mga kawatan mao ang pagpabaya sa mga tagbalay o mga establisimiyento.
Kon ang imong balay, nagpabiling abli ug kita kaayo ang imong kabtangan, makatintal kini sa mga duna na'y di maayong plano o sa mga tawo ba kaha nga nagkinahanglan. Sama ra usab ni sa mga kompaniya o negosyo nga wala'y security guards o mga CCTV cameras. Ang ilang mga negosyo, pareho ra sa mga balay nga abli, dali ra kaayo masulod sa mga daotang elemento.
Mao na nga katungdanan usab sa mga tagbalay ug mga kompaniya nga bantayan gayud ang ilang mga katigayonan.
Dili maayo nga isalig na lang nato sa kapolisan ang atong security. Kinahanglan usab nga mohimo gayud kita og lakang sa pagprotekta sa atong mga butang o negosyo ba kaha.