Samtang nagsakay ko og PUJ gikan sa dalan Urgello paingon sa Colon, dunay tulo ka lalaki nga nanakay ‘sab pag-abot dapit sa E-Mall.
Duha kanila ang mipungko lang sa tunga nga bahin sa sakyanan samtang ang usa mikapyot. Ang usa kanila mipahibalo nga manganta sila ug nangayo pa og pasaylo.
Isip pasahero wala na ko matingala ug mabalaka sa ilang pagahimoon kay naanad na ko niini tungod kay kadaghan na ako makasinati niini sanglit kada adlaw ko nagsige’g sakay og PUJ.
Apan lahi ang nahimo nako nga kasinatian niadtong tungora tungod kay sinalbahis ang gihimo sa tulo ka lalaki.
Dili sama sa naandan, ang tulo ka lalaki pugsanon nga midemanda og salapi ngadto sa mga pasahero ug ang wala mohatag gihulga ug giuyog-uyog pa og kusog ang tuhod sa pasahero.
Tungod sa ilang gihimo, ang mga pasahero nga nakapabor sa pultahan dali nga nanglayat sa sakyanan samtang ang didto sa sulod nga gustong mokanaug ilang gibabagan aron dili makakanaug sa sakyanan.
Ang gihimo sa tulo ka lalaki dili na maayo kay usa na kini ka pagpangabuso. Busa akong gitawag ang attention sa kapolisan dinhi sa dakbayan sa Sugbo pagsumpo sa mga bugoy diha sa atong kadalanan nga mokalit lang pagpanakay sa mga PUJ aron manulis.
Akong gihulagway nga tulis ang gihimo sa tulo ka lalaki tungod kay armas na lang g’yud ang ilang kuwang og tulis na ang ilang gihimo.
Karon nga nagsingabot na ang pasko, segurado ko nga ilang sakyan ang pagpamasko sa mga sakyanan mao nga akong gipanghinaot nga mahipos dayon sila sa atong kapolisan.