Bacayan Senior Citizens Ass’n

Usa sa mga aktibo nga pundok sa mga senior citizens ning dakbayan mao ang Bacayan Senior Citizens Association (BASCA) nga gipangulohan ni Emma Cabilao.

Sukad sa pagkatukod sa ilang grupo sa tuig 2003 ug hangtud karon, si Cabilao gihapon ang presidente. Ako siya nga nahinabi atol sa Senior Citizens Hour sa DYRC nga madungog matag Sabado (5:00-6:00) sa hapon.

Matag tulo ka tuig ang ilang election. Gusto na unta siya’ng mo-relax, apan kanunay siya nga sublian sa iyang mga sakop. Wala man sa ilang By-Laws nga nagsitar sa termino sa ilang pagpangatungdanan.

Kapin na sa 500 ang mga sakop sa BASCA, lakip na sa dili kaayo aktibo, kadtong tagsa ra nga motambong sa mga miting. Ang regular nila nga tigum matag una nga Sabado sa bulan.

Kun maatol nga adunay mag-birthday, alegre kaayo ang tigum kay manggawas ang mga tinagoan’g talents sa mga senior citizens. Ang mga celebrants mismo maoy moabaga sa galastoan panahon sa tigum. Of course, dili kini pinugsanay.

Ang ilang monthly dues P25 diin ang P5 niini, igahin isip mobility fund, pahinungod sa ilang masugo-sugo panahon nga duna sila’y kalihokan. Ang balance nga P20 dili g’yud hilabtan, ideposito sa bangko, gamiton panahon sa mga emergency.

Death assistance - P3 mil diha-diha ihatag dayon; hospitalization - P1,000 ang tuig. Ang ilang deposito sa bangko – P52,000.00, ug “cash on hand” – P5 mil. Ang ilang treasurer mohatag og financial report sa mga sakop matag tulo ka bulan.

Wala sila’y problema sa one percent nga gahin gikan sa barangay. Niini nagpasalamat si Emma ni Kapitan Zenaida Colina ug sa mga sakop sa barangay council, sa ilang pagpakig-alayon sa mga senior citizens.

Gipaningkamotan ni Emma nga dili kaduhigan sa politika ang ilang kapunongan, gipatigbabaw ang panaghiusa, hinungdan nga nagpabiling lig-on ang BASCA. Gidasig niya ang mga kauban sa pagtinabangay ug likayan ang pagdinaotay sa isig-usa.

Ang mga kaubang opisyal ni Emma mao sila si Cely Abendan, vice president; Helen Castillo, secretary; Julito Bistar, treasurer; Violeta Obre, auditor; Rafael Ungos, Franklin Talaroc, PROs; Jojo Natividad, Romeo Modesto, Anciano Abella, Sgts-at-arms; Edwin Polancos, Leonarda Caballero, mga advisers. Naglaraw sila si Emma nga kun makaangkon na sila’g kaugalingon nga dapit, ilang pasiugdahan ang mga livelihood projects sama sa panahi, pangborda, pangluto, ug ubang kahinguhaan nga makahatag og income sa mga senior citizens sa ilang barangay, and to keep them busy.