Roadlight studs gilugit
CEBU, Philippines — Nadakpan sa Mandaue City ang usa ka lalaki nga giingong nangawat og mga road stud lights o Cat’s Eye sa daplin sa Ouano Avenue, Barangay Tipolo.
Gidakop sa Mandaue Safety Maintenance Area Response Team (Mandaue-SMART) ang suspek human kini naaktohan nga gilugit ang mga road stud lights nga gibutang sa dalan.
Gidala siya ngadto sa Subangdaku Police Station niadtong Nobyembre 6 ug nag-atubang karon og kasong theft. Nagpabilin siyang napriso estasyon sa kapulisan hangtod sa pagkakaron.
Matud ni Mandaue-SMART team leader Gerard Glenn Soon Gobalani, mokabat sa tulo ka road stud lights, lakip na ang mga kable niini, ang gikawat sa suspek.
Gibutyag ni Gobalani nga gituohang ibaligya sa suspek ang mga gikawat nga materyales pinaagi sa pagbaligya niini kada kilo tungod kay hinimo kini sa aluminum.
“Nakita to nato kay naay nisumbong sa atoa,” matud ni Gobalani.
Matud ni Gobalani, bisan pa og nagdan-ag pa ang mga road stud lights, gitangtang gihapon kini sa suspek gamit ang silsil ug martilyo.
Dugang pa ni Gobalani, giingong ang kuwarta nga makuha gikan sa pagbaligya sa mga gikawat nga materyales gamiton unta sa pagpalit og ilegal nga droga.
Base sa rekord, dili kini unang higayon nga nadakpan sa kapulisan ang maong Nagpadayon ang pagmonitor sa Mandaue-SMART sa maong lugar aron malikayan ang susamang insidente ug mapanalipdan ang mga pasilidad sa publiko.
Nagpasalamat usab si Gobalani sa mga concern nga residente ug mga drayber nga ni-report sa gibuhat sa suspek.
Giawhag usab ang publiko nga motabang sa pagpanalipod sa mga pasilidad sa gobyerno ug i-report dayon sa otoridad ang mga kadudahang kalihokan. Ang road light studs nagsilbing giya sa mga drayber pagsubay sa dalan panahon sa gabii ilabi na sa mga dapit nga walay poste sa mga suga.— IBM BANAT NEWS
- Latest
