Anam-anam na nga natukas ang tabil nga nagsalimbong sa pagmika sa ubay-ubay’ng kapolisan sa kampanya batok sa ilegal nga drugas ug ilegal nga sugal diha sa tagsa-tagsa nila ka dapit.
Human ang Banat News mipublikar og contact numbers diin ang publiko makasumbong sa ilegal nga kalihukan diha sa ilang tagsa-tagsa ka dapit, puwerte’ng daghana sa kasayuran nga nadawat.
Sagad g’yud hinuon sa mga gipangsumbong naglambigit og ilegal nga sugal sama sa video karera, tigbakay ug pipila ka hantak ingon man ang padayon pagpamaligya og shabu.
Kun hinuktokan pag-ayo tataw kaayo nga masabtan nga ang kapolisan sa lainlaing police stations nagpabuta-bungol lang sa ilegal nga kalihukan sa ilang dapit.
Base sa report nga nadawat niini’ng mantalaan misiaw ang shabu sa ubay-ubay’ng barangay apan daghan ang mihatag og ngalan sa mga drug pusher diha sa Barangay Pulangbato, Suba, Tejero ug Pasil.
Samtang walay report nga adunay video karera sa Pulangbato, apan daghan kaayo ang report nga misiaw na pag-ayo ang video karera diha sa Sitio Bato, Ermita, diha ‘sab dapit sa Fish Port sa Barangay Suba, duna ‘sab sa Pasil ug Tejero.
Imposible kaayo nga ang kapolisan nga nadistino niini’ng mao nga mga dapit walay kasayuran niini’ng problema. Klaro kaayo nga sila nagpakabuta ug bungol lang kay tingali adunay kasabotan.
Dako’ng hagit alang ni Cebu City Police director Noli Romana ang pagsumpo niini’ng mao nga mga ilegal nga kalihukan.