EDITORYAL – Binuang nga dredging sa sapa

Mga lumolupyo kang kansang kabalayan nahimutang daplin sa gitawag og Parian Creek mitug-an nga wala lagi g’yuy pagpalawom sa kinatibuk-ang bahin sa sapa. Husto lagi g’yud ang gibutyag niini’ng pamantalaan nga giusikan lang g’yud ang minilyon ka pesos nga gigahin sa  pagpalawom unta sa sapa.

Makaingon kita nga giusikan lang ang dako’ng kantidad sa kuwarta kay ang mga engineer nga sakop sa Department of Engineering and Public Works (DEPW) nga gitahasan sa pag-supervise sa proyekto nagtanga man lang nga wala magbantay sa binuang sa nagtrabaho pagpalawom unta sa sapa. Posible pa gani nga nakigkonsabo sila.

Kini maoy hinungdan nga bisan hinay lang kaayo ang ulan maglunop na dinhi sa downtown area apan walay lunop didto sa tumoy sa sapa dapit sa Pier 2 kay ang problema dia ra man dinhi sa downtown. Kun tutokan pag-ayo gikan sa kahitas-an, ang sapa dapit dinhi sa downtown area nahisama na sa kawa.

Kun dili seryoso ang atong mga opisyal pagsulbad sa problema kabahin sa paglunop sa dakbayan kun adunay uwan, bisan pa og pila ka milyon ka pesos  ang itagana alang sa “dredging projects” dili masulbad ang paglunop ug mausik lang ang kuwarta sa katawhan.

Pipila ka semana ang milabay, usa ka konsehal sa dakbayan sa Sugbo misugyot na usab nga pagahinan og kuwarta ang pagpalawom sa mga sapa dinhi sa dakbayan. Dili imposible nga ang bilyako nga engineer magpahiyom na ‘sab kay magkahulogan man kini og lain niya nga kaayohan.

Ngano man nga mapirmahan man nga kompleto na ang “dredging project” nga ang gipalawman mao ra man ang anaa mahimutang daplin sa karsada?