Nalipay kaayo ko diha nga gipahibalo ni LTO-7 Acting Regional Director Arnel Tancinco nga himoan nila og operation kini’ng mga motorista kang kansang mga sakyanan walay plate numbers ug kadtong mituyo sa pagtaptap sa ilang plaka sa sakyanan aron lisud mabasa.
Nagkadaghan kini’ng mao nga mga sakyanan. Angay nga ipahamtang sa mao nga mga motorista ang dagko nga multa base sa Joint Administrative Order 2014-01 kay tinuyoan man nila ang paghimo sa mao nga salaod.
Base sa bag-o nga kamandoan, P5 mil ang multa niini kun masakpan nga ang sakyanan gitaptapan ang plaka og mga bildo o plastic nga lisud na mabasa. Abusado ug walay mga buot kini’ng mao nga mga motorista ug unta maleksyon ra sila sa kabati sa ilang gihimo.
Gibalik-balik na nako sa pagpasabot nga kun ang mga sakop sa ilang pamilya madam-agan og sakyanan nga gitaptapan ang plate numbers, malipay kaha sila nga maghuna-huna nga adunay nakakita apan dili makatug-an sa plate numbers kay dili man mabasa?
Kini’ng mga tawhana nga mitaptap og itom nga bildo o plastic sa ilang mga plate numbers, klaro kaayo nga adunay plano nga mosibat kun makasugat og aksidente ang ilang mga sakyanan.
Kun deputize pa lagi ko sa LTO, gipangsakmitan ko na og lisensya kini’ng mao nga mga abusado nga drayber. Mao na nga kamo nga gi-deputize sa LTO, ilabi na ang mga organic members, pangdakpa gayud ninyo ang mga motorista nga mitaptap sa plaka sa ilang sakyanan.
Ayaw kahadlok bisan og sila mga sakop pa sa laing law enforcement units kay dili sila angay’ng tahuron tungod sa ilang kaabusado. Diha’ng deputize pa ko kaniadto sa LTO, daghang polis nga ako’ng gisakmitan og lisensya, apan sa maayo nga pagpasabot kanila.
Ang mga polis kun dakpon nimo dili man masuko basta ayuhon lang pagpasabot kay sila mga tinugyanan man usab sa balaod. Pinaagi sa pagdakop kanila, makakat-on ra sila og leksyon. Nagtuo man gud ang uban nga mananakop nga walay modakop kanila.
Fight sir Arnel, sugoa gayud ang imong mga sakop nga mohingusog sa kampanya.