Kaayo ni Tomas na-miss sa Guadalupe Church
Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Kaniadto nga si Tomas Osmeña pa ang mayor sa Sugbo, daghan kuno ang motambong sa bible study nga gipangulohan ni Msgr. Achilles Dakay, diin anha himoa mismo sulod sa simbahan sa Guadalupe matag Martes sa ika-alas 7:00 sa gabii. Kini tungod kay pag-abot kuno sa maong adlaw, kuhaon gyud sa Kaoshiung Bus sa gobiyerno ang mga parokyano, kinsa anaa magpuyo sa kabukiran nga nahisakop sa Barangay Guadalupe.
Di lang kay kuhaon sila. Ihatod pa gyud nga libre. Dinhi nakita sa mga lumolupyo ang kalumo sa kasingkasing ni Tommy diha sa talagsaong matang sa iyang pagpangalagad dili lang sa katawhan; kun dili, hasta na sa simbahan.
Apan dihang si Mayor Michael “Mike†Rama na kuno ang nakalingkod sa Cebu City Hall, mikunhod ang manambong sa Bible Study ni Msgr. Dakay. Unsaon, may bayad na man ang Kaoshiung Bus: P2,000 ang abang sa sakyanan ug lain pang P500 nga pang-gasolina (P2,500 tanan). Kada semana pa ra ba gyud ni? Pastilan, di intawon ni kaya ni Msgr. Jomon Montecillo, uy!
Aw, resulta...diyotay na lang gyung taga bukid ang makaadto sa Bible Study. Mao ni rason nganong na-miss sa taga Guadalupe Church ang kaayo ni Tomas. Kini base sa gikompisal sa mga katekista, psalmist ug lector, kinsa gikahinabi ning tagsulat. Hala, no?
Kun tinuod man kining ilang giyagyag, may luna pa sa pagbag-o. Ug nag-agad kini sa Diyosnong hukom ni Mayor Mike: “Sundon ba niya ang kaayo ni Tomas, o ipadayon niya ang pagsingil og P2,500 sa higayon nga gikinahanglan sa simbahan ang serbisyo sa Kaoshiung Bus?
- Latest
