Sikat ang University of San Carlos (USC), Cebu City sa natad sa edukasyon. Sagad sa mga produkto niini, dekalidad ug kasaligan. Tapokanan kini sa mga brayit gikan sa nagkalain-laing eskuwelahan (ma-probinsiya, lungsod man, o dinhi sa siyudad). Resulta, halos kada-higayon nga may board or bar exam, maapil gyud sa 10 nga mo-top ang USC.
Bisan asang kompaniya, labi na dinhi sa ato, kun may job opening, pirme gyung iprayoridad kanunay ang application letter sa mga nangaplay, kinsa migraduwar sa USC. Hinungdan, nga ang makasulod gilayon og trabaho, mga produkto ning maong unibersidad. Sa amo lang trabahoan, daghan ming Carolinians ang nagkauban nga may taas nang posisyon.
Kun working student ka sa USC, humok kaayo kang madawat og trabaho. Ngano? Nindot og training kining eskuwelahan. Gikan sa punctuality hangtod sa honesty, kini gisilsil kanunay sa imong alimpatakan. Hinuon, ang mga regular employees sa USC dili dako’g suweldo. Igo-igo ra gyud makainom og tubig.
Kini tungod kay ang USC is a non-profitable institution. Dili kini makadalidali’g hatag og salary increase sa mga empleyado sanglit dili man kini sama sa mga dagkong kompaniya nga may binilyong ganansiya sa ilang negosyo. Ang suweldo sa USC maglisod pagbuhi’g dakodako nga pamilya. Labi na ning panahona, nga gaan na lang gyud kaayo ang balor sa peso.
Mao nga ako kanhi, isip Commerce Evaluator sa USC Registrar’s Office, naningkamot gyud nga makabalhi’g trabaho. Ayawat, makaginhawa’g gamay. Kay alang nako, stepping stone lang ang USC para makab-ot ang gipangandoy’ng damgo. Ug wa ako magmahay sa akong gihimo.