Ang sunog maghatag og dili tiaw nga sakripisyo ngadto sa hingtungdan nga mga tag-iya sa kabalayan nga maugdaw, apan usahay ang sunog mosangpot og kaayohan.
Ingon niini ang nahitabo sa Barangay Lorega-San Miguel nga kaniadto nagpunsisok ang mga balay ug gubot kaayo kay nagkalandrakas lang ang porma sa kabalayan, lainlain ang gidak-on ug porma.
Ang lapad kaayo nga lote nga nasunogan walay karsada nga kaagian sa mga fire trucks mao nga diha’ng miulbo ang sunog kaniadtong Marso 18, kapin sa 500 ka balay ang naugdaw.
Human sa sunog, gihimoan na og karsada ang lapad kaayo nga lugar ug gibahin sa pareho nga gidak-on ang mata’g lote. Wala na itugot pa nga iabot sa daplin sa karsada ang kabalayan. Aron pagsiguro nga walay molapas, gikoral ang daplin sa karsada.
Hapsay na tuod tan-awon ang daplin sa karsada kun itandi kaniadto nga gubot. Hinuon, sigurado nga kadto’ng apektado niini nagbagolbol g’yud, apan angay ba gud sila paminawon?
Ang koral daplin sa karsada maoy magpugong sa mga mapahimuslanon nga ipaabot nila sa karsada ang ilang kabalayan.
Sa ato pa, ang sunog nga nahitabo sa Barangay Lorega-San Miguel nakahatag og maayo nga resulta sa kampanya sa dakbayan sa Sugbo pagpanindot sa siyudad.
Apan ingon na lang ba gayud niini ang himuon sa dakbayan nga maghuwat kita nga ang usa ka dapit masunog usa kita makahimo og kausaban?