EDITORYAL - “Napo-list” kamatuoran o panglawgaw?

Ug migawas na gyud, ang gisigehan og panawagan sa mga magbabalaod nga gibansagang “Napo-list” o ang listahan sa kuno mga senador ug kongresista nga nakakwarta sa operasyon sa negosyanteng si Janet Lim Napoles.

Apan duna diay kini managlahing mga bersyon, ang bag-ong gipagawas ug mikatap na karon matud pa gikan kang rehabilitation czar Panfilo “Ping” Lacson, duna say bersyon nga matud pa gikan mismo kang Napoles nga anaa karon kang Justice Secretary Leila De Lima ug duna pay ikatulo, bersyon sab kuno ni gikan sa whistleblower nga si Benhur Luy.

Samtang naghinam-hinam ang katawhan sa pagpaabot nga iladlad sa publiko ang maong listahan, nakugang usab kini sa managlahing mga bersyon. Karon ang pangutana, kang kinsa man kaha nga bersyon ang husto.

Dili ba kaha kini makapalawgaw lang og samot sa dagan sa imbestigasyon sa Senate Blue Ribbon Committee. Kung tan-awon og maayo, dunay bersyon nga nag-ingon kinse gyud ka senador ang naapil sa maong scam, nag-una kanunay sa listahan ang kadtong permanente nang gipanganlan.

Apan nabantayan usab nga dunay mga naapil sa lista nga mga kongresistang bagito pa sa Ubos Balay Balauranan. Mga kongresista nga wa gani makasimhot o makakupot  sa Priority Development Assistance Fund (PDAF) tungod kay gisuspenso na man ang pag-release niini karong tuiga. Ang pangutana karon,  masaligan pa ba kaha kining mga listahan? Kung dunay daghang bersyon ug may mga naapil pa sa listahan nga kwestyonable kaayo kun nganong  makapaabot ba ang katawhang Filipino og limpyo ug impartial nga imbestigasyon?