Ang lit-ag

Didto sa Afrika, may mga hunters didto nga ang tuyo, makadakop og buhing mananap sama sa unggoy aron ipamaligya kini sa mga zoo sa Amerika. Simple ra kaayo ang gihimo nilang paon o lit-ag, nga gipahaom segun sa kinaiya sa unggoy. Nasayud ang mga hunters nga ampay o ulit ni og mga lamiang nuts.

Busa nagdala sila’g mga botelya nga bug-at para sa mga unggoy, nga may sulod nga nuts. Ila kining gipamilin didto sa lasang diin gituohan  nilang may daghang unggoy anang dapita. Unya pagkasunod nga adlaw, ilang balikan ang maong dapit. Haska nga igo lang nagpanlingolingo ang mga hunters nga nagsud-ong sa mga unggoy nga nagkawil sa botelya nga wala na kadagan.

Ang sistima gud ingon ani  igkakita  sa mga unggoy nga sa sulod sa botelya may nuts, kuoton ni sa unggoy nga igo lang masulod ang kamot ini. Ang nakaapan, kun makumkom na ang nuts, dili na maigawas ang kamot kay di na buhian ang gikumkom. Nga tungod sa kahakog, wa na panumbalinga ang peligro. Mahimo man unta nga di madakpan kun buhian ang gikumkum kun  mao may gipalabi.

Tingali makaingon kita sa unggoy nga labihan ka tanga o yabag kaayo sa ilang gihimo. Apan sakit palandungon nga kita nahisama usab sa unggoy. Ang katumbas sa kabug-at sa botelya, mao ang kabug-at sa kasakit ug kasilag nga giluom lang sa mga tawo diha sa ilang dughan. Angay nga ato kining ipagawas o hataga’g kagawasan ang unsa man nga gihambin nga kasakit.

Ang garbo usahay makadaut sa himuon natong disisyon sa kinabuhi. Nga kun di kini mamaayo pagkabalanse sa atong panghunahuna, mahimong mosangpot hinuon kini nga ikaw hingpit nga mawad-an sa paglaum. Ang lit-ag mao ang mga pagsulay sa kinabuhi. Di kita motugot nga di na kalihok gumikan lang sa kasakit. Mobarug kita bisa’g natakilpo o nadikan-as, ayaw pagpakawa sa kusog kay sa unahan anaa ang kahayag sa gipangandoy mong kabulahanan.

Ayaw’g kalimot nga taas na ang panahon, gipuhunan mo’g daghan kasakit. Naumol kana sa mga pagsulay, hangtud ron may kinabuhi pang gihatag kanimo. Ang dakung kapuslanan nga kini masinati nato, mao ra kanunay ang pagsalig ug pagtugyan sa kaugalingon ngadto sa kahitas-an pinaagi sa tiunay nga pag-ampo.