Ang akong biyahe sa Japan ang giisip nakong usa ka katumanan sa damgo. Kinsay magtuo nga ang lugar nga giisip nga usa sa labing adunahan sa kalibutan, nihatag nako og visa aron sa pagduaw sa ilang dapit. Salamat sa gitawag nga mga travel agency ug mga tour package, mas sayon ang biyahe karon ug mas barato kung itandi sa mga nangagi nga tuig. Sa miaging buwan pa lang, nakuha nako ang tour package paingon sa Japan. Kauban ang duha ka higala, kabahin mi sa kapin traynta ka tawo nga moduaw sa maong nasud. Nindot ang itinerary ug puno sa suroy ang maong biyahe. Wa’y kasudlan ang akong paghinam-hinam nga makaduaw sa nasud nga Japan. Wa’ namo damha nga mapahiran og bating kasinatian ang unta nindot nga bakasyon.
Niabot mi sa Japan kauban ang gitawag nga travel agent. Iya mi nga gipasaligan nga han-ay na ang tanan ug matuman ang unsa may anaa sa tour package nga among gibayran. Apan sa pag-abot namo sa Haneda International Airport, way bus nga nisugat namo ug ang labing pait—way hotel nga gi-book alang namo. Kini ang rason nga naalarma na ming tanan ug nangita og paagi kun asa mi mopuyo. Wa’y nahimo ang mismong travel agent nga kauban namo gawas sa pagdawat sa mga kasaba ug kalagot sa mga kauban sa biyahe. Apan sa usa ka tawo nga nahimo nang negosyo ang pagpangilad, wa’ nay kasaba ug pagpanginsulto nga modu’t pa niya. Ang mahinungdanon nga nikita na siya sa maong biyahe.
Niabot mi og hotel nga mas mahal apan kinahanglan nga mogasto aron aduna mi kapuy-an. Gibaliwa’ na lang ang gasto namo tungod kay ang labing mahinungdanon nga makapahuway ug makakita og kakan-an. Apan mas makakugang ang mga nisunod nga panghitabo. Pagka-ugma, nagduda mi sa usa sa among mga kauban nga nitanyag og laing kapuy-an. Matud niya, gitanyag sab ni ngadto niya sa travel agent. Apan ang iyang paagi sa pagdani namo, makapaduda nga kauban ra siya sa travel agent. Gani, siya pa ang nagkombensir namo nga di’ na ihinayon ang among giplanong class suit batok sa travel agency.
Giisip namong ‘devil’s advocate’ ang maong babaye tungod kay iya ming gipatuo nga biktima ‘sab siya ug mas dakong salapi ang nakuha gikan niya. Matud niya nga nibayad siya og tag dos sientos mil pesos sa iyang bana aron makauban sa maong biyahe. Iyang gitataw nga wa’ mahibawo ang iyang bana sa kadakong kuwarta nga nakuha gikan niya. Ang labing makapaduda tungod kay sa normal nga sitwasyon, kung anaa ka sa punto nga giilad ka, di’ kaha ka magkisi-kisi sa pagpalaban sa imong bana aron masilutan ang babaye nga niilad ninyo? Nagduda mi nga kini na ang bag-ong modus karon sa mga agency ug nga posibleng daghan na sila og nabiktima ning maong scam.
Kung ikaw ang travel agent nga nangilad, nganong mo-uban pa man ka sa grupo sa maong tour nga imo namang nakuha ang imong gusto? Duda mi nga aduna siyay mga kauban nga anaa sa among grupo apan wa’ magpaila apan andam kanunay nga manalipod kaniya kung moabot sa punto nga maapiki na siya. Ang maong paagi, tataw nga gihimo sa maong travel agent tungod sa kaisog nga iyang gipakita bisan pa sa among tinguha nga ipa-pulis siya didto sa Japan. Usa ka lakang nga wa’ molampos tungod kay dinhi sa Pilipinas nahitabo ang krimen ug nga wa’y mga taga Japan nga direktang nalambigit sa maong isyu. Ang sakit mao nga mga Pinoy ra ‘sab gyud ang moilad sa isig ka Pinoy. Ug nagtuo kong dinhi lang ni sa Pilipinas mahitabo, mahimo ‘sab diay ni sa ubang nasud.
Ning bag-o lang nituhop sa akong huna-huna nga usa diay sa mga rekisitos sa pagkuha sa visa mao ang among bank statement ug employment certificate. Nahibalo nang daan ang maong travel agent kung pila ang among kuwarta ug nga bisan pa og lisud-lisuron mi sa Japan mahimo ming makabarug ug makakita og kapuy-an. Labaw sa tanan, mahimo pa ming mabiktima ug makilkilan og kuwarta gamit ang kaubang mangingilad.
* * *
Email: ricolucena@yahoo.com or ricolucena@ilovecomarts.com