Politika ang mibuhi,politika ang mipatay

Kun wala pa lang unta gyu’y pamolitika, dugay ra nga na-award sa GMR-Megawide ang multi-million expansion project sa Mactan Cebu International Airport.

Sukad sa pagboto niining maong estorya nga milandig sa mga pamantalaan, radyo ug telebisyon, wala’y lain nga ngalan nga giakusahan nga nagpaluyo sa pagpahunong sa pag-award sa midaog sa subasta – si Tomas Osmeña.

Hangtod karon wala ko motuo nga si Tomas ang nagsamoksamok nganong nalangay ang pag-award sa Department of Transportation and Communication (DOTC) sa kontrata ngadto sa GMR-Megawide tungod kay wala man kini kompaniya nga gipanag-iya nga miapil sa subasta.

Apan bisan wala ko motuo niini, ang estorya daw hangin nga dali kaayo makaabot sa dalunggan sa mga Sugboanon. Ug ang estorya mao nga si Tomas ug ang tag-iya sa Filinvest suod kaayong managhigala.

Ang Filinvest maoy nagkuwestiyon sa pagdaog sa GMR-Megawide sa gihimong subasta mao nga nalangay ang pag-award sa kontrata. Ang nahitabo, nalangay hinuon ang pagpabarog sa mga bag-o ug modernong mga terminal sa MCIA ug ang nakitang dakong dautang resulta niini mao ang atong ekonomiya.

Makasabot kita sa Filinvest tungod sa kabalido sa rason nganong hugot nga gibabagan nga makasulod sa kontrata alang sa airport expansion project. Kini mao ang “conflict of interest.”

Apan bisan unsaon og balibali ang pag-analisar sa katawhan, mogawas gihapon ang ngalan ni Tomas nga maoy nagpatuyok sa isyu aron dili makasulod sa kontrata ang GMR-Megawide nga gipadagan og mga Bombay.

Kun ako’y pabut-on mas maayo ang Filinvest nga maoy padad-on sa proyekto tungod kay Pilipino ang tag-iya niini ug giingong adunay kagikan dinhi sa Sugbo. Sa ato pa, adunay kasingkasing alang sa Sugbo.

Apan unsaon ta man nga ang mogawas nga ngalan nga hinungdan sa pagpalangay sa proyekto mao man si Tomas.

Tingale, kun wala pa si Tomas mahimong lehitimo ang panagsakbang tali sa Filinvest ug GMR-Megawide.

Kay naapilan man sa ngalan ni Tomas ang away, nahimong politika ang isyu.

Natayming usab karon ang pagkapilde sa Filinvest nga gibak-apan ni Tomas nga ang igsuon ni Tomas misugod pud og sungag sa Malacañang ug mismo si Pres. Noynoy Aquino ug iyang mga alipures, ilabi na si Energy Secretary Jericho Petilla, gisaway pag-ayo ni Sen. Serge Osmeña.

Mag-unsa man ang pag-lobby ni Tomas didto sa Manila nga ma-award sa Filinvest ang proyekto sa MCIA kun ang iyang igsuon misugod na og alkontra sa administrasyon ni Noynoy?

Mao kini ang giingon nga kay politika man ang gigamit nga gahum aron mababagan ang GMR-Megawide nga makasulod sa proyekto, ang politika usab ang mipatay sa maong gahum.

* * *

Dili ko ganahan nga mobutangbutang og estorya sa akong isi’gka-tawo, apan kagahapon adunay talan-awon nga dili nako mapugngan nga mapublikar.

Sa pagkakita nako sa talan-awon sa usa ka kan-anan sa South Road Properties, nakaingon ko nga ang gigamit sa GMR-Megawide pagpakigsakbang sa Filinvest politika usab.

Si Kapitan Joel Garganera nga nailang gamhanan nga alyado ni Mayor Mike Rama maoy nagkuyogkuyog sa mga opisyal sa GMR-Megawide samtang nangaon sa kan-anan sa SRP.

Dili ko mobutang og pagduda sa akong nakita kay basin og amigo lang silang daan. Timan-i, sa ilang grupo, si Kapitan Joel ra ang Pilipino nga akong nakit-an.

Wala unta ko makabantay, apan ang akong kumpare nga nakaila sa mga taga GMR-Megawide maoy nagsulti nako sa panagkuyog nila ug ni Kapitan Joel.

Sa pagkakita nako nila, nakapamasin ko nga politika usab ang gigamit nga stratehiya sa GMR-Megawide aron maadto kanila ang kontrata human makadaog sa subasta.

Hinuon, mismo ang business community sa Cebu anaa man molaban sa GMR-Megawide. Kasagaran sa milaban sa GMR-Megawide mikondenar sa politiko nga nag-apil-apil aron malangay ang proyekto tungod kay ang ekonomiya na ang apektado niini.

Sa ako nang giingon, si Kapitan Joel sakop sa Team Rama ug si Rama karon nakatigum og impluwensiya sa Manila nga sa akong pamasin nagkakusog ug malisod lisoon, bisan ang moliso si Tomas nga taudtaod nang nagpahibalo nga wala na siya’y cancer.

Karon nga na-award na sa GMR-Megawide ang proyekto, hinaot wala nay samoksamok nga himuon ang uban nga kampo.

Nagtuo hinuon ko nga ang Filinvest usa ka responsible corporate citizen, ug nakasabot sa epekto pananglit langayon pa pag-ayo ang airport expansion project.

Politika ang mibuhi sa pagbabag, politika lamang usab ang mipatay niini.