Gipatay sa amahan nga adik ang iyang lima ka tuig nga anak niadtong Domingo sa hapon sa barangay San Vicente lungsod sa Liloan sa lalawigan sa Sugbo. Human patya ang anak pinaagi sa pagpusil sa ulo niini, nagpusil usab sa iyang ulo ang adik nga amahan ug namatay. Niadtong hapona duha ang patay, si Francis James, ang anak ug ang iyang amahan nga si Fritz Villamor.
Sa wala pa mahitabo ang krimen, ang lima pa ka tuig nga bata nagduwa-duwa pa sa iyang trak-trak sa may covered court dihang gitawag sa amahan ug gidala sa ilang balay. Ang mga polis nga nag-imbestigar sa kaso nagtuo nga nakigduwa pa sa iyang anak ang amahan sa wala pa niya kini patya. Ang krimen mugna sa ginadiling drugas.
Kami sa New Generation Against Drugs and Corruption, Inc.(NEWGAD,INC.) nagtuo nga ang lig-ong pamilya ug maayong pagpasabot mahitungod sa dautang epekto sa ginadiling drugas mao ang sulbad sa nahisgutang suliran. Apan unsaon man sa pagka- epektibo sa pamilya kun ang haligi na mismo ang nagsugod ug apektado na niini.
Ang pagpatay sa amahang adik sa iyang lima pa lamang ka tuig nga anak usa ka dakong buhing kamatuoran nga walay maayong kapaingnan ang gikabuangan sa uban nga ginadiling drugas. Busa sa mga nagkabuang niini, ila na unta kining biyaan.
Bisan og gipatay sa amahan ang iyang anak tungod sa ginadiling drugas, ako pabiling nagtuo nga ang lig-ong pamilya mao gayod ang sulbad o tubag sa suliran sa ginadiling drugas. Ug kay mao man kini ang tubag o sulbad di, palig-onon ug tutokan sa gobiyerno ang pamilya.
Ang lig-ong pamilya dili lamang makatabang sa pagwagtang o pagpaminos sa suliran sa ginadiling drugas kun dili makapalig-on usab kini sa nasud. Ang pamilya giila nga pundasyon sa nasud sa atong batakang balaud busa gikinahanglan nga palig-onon kini aron molig-on usab ang nasud. Huyang ang nasud kun ugaling huyang ang pamilya ilabi na gayod kun kini adik.
Busa giawhag ko kamo ug ikaw sa pag-uban kanamo sa New Generation Against Drugs and Corruption sa pagpakigbatok sa ginadiling drugas ug iapil usab nato ang corruption.