ALC with JVJ

Maayo ra sad nga nakahunahuna si PNoy sa pagsaulog sa Edsa People Power Revolution dinhi sa Sugbo aron mahibalik sa panumduman sa mga Sugbuanon kadtong kasadya sa katawhan dihang nahibaw-an na nga natagak na si Pangulong Marcos sa katungdanan ug nahibalik na ang demokrasya.

* * *

Ang mga Sugbuanon mihugyaw dihang naklaro na nga wa na si Marcos sa Malacanang ug gilupad na sa US Air Force plane padung sa Hawaii.

* * *

Ang sentro sa hinugyaw mao ang Fuente Osmeña diin libuan ka mga Sugbuanon ang nagpundok ug naglinamanuhay ug nagginaksanay pa gani bisan wala mag-inilhanay gumikan sa kalipay nga human sa 20 ka tuig diin napatay ang demokrasya dinhi sa nasud nahibalik kini dihang nagmalampuson ang People Power Revolution didto sa Edsa.

* * *

Sobra ang kalipay sa katawhan. Ug kini atong nakita dihang pipila kanila nagkanta ug nagsayaw. Dihay tindero og balut, iyang gipanghatag ang iyang balut libre tungod sa kalipay.

* * *

Ug nahinumdom pa ko sa usa ka inilang newspaper photographer nga naghinobra ang kalipay nalimot na sa pagpanguha og hulagway kay nalingaw na sa pagsayaw-sayaw.

* * *

Alegre, grabe gyung alegreha, dihang nahug na si Marcos sa dakong poder nga iyang gikuptan sud sa 20 ka tuig. Sakit lang palandungon nga ang legasiya sa Edsa People Power mora na’g napapas sa panumduman sa pipila kanato.

* * *

SA LAING BAHIN ... Gikataho nga ang People Power saulogon usab ni PNoy didto sa Tacloban, uban sa mga Leyteno ... Mangumusta kita sa atong mga higalang magbabasa sa tibuok Kabisay-an. Daghang salamat sa inyong suporta sa Banat News.