Higanteng populasyon

 Karong tuiga, gitakdang mokabat na subra sa 100 milyones ang populasyon sa Pilipinas. Kini matud pa sa Commission on Population (PopCom). Sa niaging tuig, 93 milyones ang populasyon sa nasud.

Gikahadlokan karon sa kagamhanan ang resulta sa grabeng pagsulbong sa populasyon sa nasud. Babag kuno kini sa kalamboan sa nasud. Kini tungod kay dakong kulang sa resources ang gobiyerno pagsuporta sa dakong populasyon.

Dili gayud maayo kining pagsulbong sa atong populasyon ning panahon nga kulang kaayo ang trabaho. Gani hilabihan ka dako sa atong unemployment rate gumikan lagi kay nagnihit ang trabaho. Sa laing bahin, adunay daghang opening apan daghan usab ang dili kwalipikado. Sama pananglit sa industriya sa call center ug mga IT-related work. Daghan tuod kini og opening apan pipila lamang ang makasulod.

Dako kini nga problema sa atong kagamhanan. Ilabina nga daghan sa mga wala’y trabaho sa nasud ang maglisod pagpangita og desenteng panginabuhian tungod sa ubos nga edukasyon nga ilang nakab-ot.

Bisan pa man sa kampanya sa gobiyerno pagkontrol sa higante natong populasyon, adunay pipila ang grabe usab nga nakababag. Ang simbahang Katoliko ug ubang pro-life groups ang mipakusog usab sa ilang kampanya batok ning maong lakang sa gobiyerno.

Gani, ang reproductive health law wala karon nakabuwelo. Alang unta kini pagkontrol sa populasyon sa nasud. Apan tungod sa grabeng pagsupak sa Simbahan ug ubang mga grupo, atua kining maong balaud nag-ung-ong sa Korte Suprema karon.

Kun atong buot sabton, klarong dakong babag sa kampanya alang sa kalamboan kining nagkadako nga populasyon sa nasud. Mao nga dili ka buwelo ang atong ekonomiya gumikan kay tua na man hinuon gibubo sa kagamhanan halos ang tanang resources niini ngadto sa populasyon.

Apan nagkinahanglan ang Aquino administration og political will alang sa pagpatuman sa palisiya sa population control. Kinahanglan dili kini magpadanga-danga ug moyukbo sa gahum niadtong mga mialkontra sa reproductive health law.

Kaya sa kagamhanan ang pagkontrol sa atong nagkadakong populasyon. Nagkinahanglan lamang kini’g political will pag-implementar sa mga palisiya niini.