Way makapugong sa Pasko

Apan angkunon na lang nato tanan, nga mas mingaw ang Pasko karon itandi sa mga miaging katuigan.  Kana kung ang dekorasyon sa mga panimay ang basehan.  Kung kaniadto, nagpunsisok ang kadaghan sa mga dayan-dayan diha sa mga balay, karon pipila na lang ang nagpadayon sa maong tradisyon.  Kung aduna may nagbutang og mga suga sa ilang balay, limitado ‘sab ang gidaghanon ini itandi kaniadto.  Kung kaniadto, Septiyembre pa lang nagsugod na sa pagpatukar sa mga Christmas songs, karon daw hilom ang kahanginan.  Masabot na to ang ingon ining matang sa disposisyon tungod kay giputos ‘ta sa mga katalagman sugod pa lang sa buwan nga nagsugod sa ‘ber.

Niadtong Septembre, natay-og ang atong seguridad tungod sa niulbong kasungian didto sa Zamboanga tali sa gobyerno ug sa Moro National Liberation Front.  Sa buwan sa Oktubre nalisang ‘ta sa kusog nga linog nga nitay-og sa Sugbo ug sa lalawigan sa Bohol.  Sa miaging buwan, nasukod ang atong katakos, panaghiusa ug pagtuo dihang giharos ang dakong bahin sa Kabisay-an sa labing kusog nga bagyong Yolanda.  Tungod sa maong mga katalagman nga wa’ nato damha, ang pagsaulog sa Pasko ang mas nabutang sa dakong alaot sa katapusang buwan sa tuig.

Apan alang sa kadaghanan nato, pagkanindot paminawon nga nahitabo ang mga katalagman sa tulo ka nagsunod-sunod nga buwan ning katapusang bahin sa tuig.  Aron sa pagsu’d sa buwan sa Disyembre, adunay mas lawom ug hingpit nga mensahe ang diwa sa Pasko.  Di’ man bongga ang mga dekorasyon, apan mas bongga ang atong pagkamanggihatagon karon itandi sa mga miaging tuig.  Kung sa miaging tuig, napuno sa mga hikay ang atong lamesa karon mas gamay na lang tungod kay ang usa ka bahin ini tua sa ubang lamesa nato gihatag.  Lamesa sa mga tawo nga nabiktima sa makalilisang nga katalagman.

Lahi ang Pasko karon itandi sa uban tungod kay mas mingaw.  Apan mas maayo nang magmingaw tungod kay  nagpasabot ni nga mas gipahimug-atan nato ang pagsakripisyo sa atong kaugalingon nga kalipay tungod ug alang sa uban.   Sa maong punto mas napahimug-atan nato ang tinuod nga diwa sa Pasko—ang paghigugma, pagpinasayloay ug pagsakripisyo alang sa uban.  Tungod sa mga trahedya nga atong nasugatan mas dakong buhi ang presensya sa kahitas-an nga nagpakatawo di’ alang sa mga tawo nga buhong sa grasya, apan alang niadtong kapus sa mga butang.  Di’ alang niadtong anaa sa taas nga estado sa pagpuyo apan alang niadtong wa’y  halos madawdaw sa ilang kinabuhi.  Di’ alang niadtong luwas na sa mga sakripisyo apan alang niadtong nag-antos sa ilang pagpuyo.

Kung ang Pasko ang mosukod sa tinuod nga gugma ug pagsakripisyo sa usa ka tawo, karon pa lang nasukod na tang tanan tungod sa mga butang nga atong gihimo samtang nag-antos ang sagad nato sa mga pagsuway sa wa’ damhang katalagman.  Sakripisyo ang mawad-an og balay, magub-an og mga butang, mawagtangan og panginabuhian ug labaw sa tanan ang ma-ilo sa mga mahal sa kinabuhi.  Apan dakong grasya kung atong tan-awon nga nakasugakod ‘tang tanan likod ining mga pagsuway.  Nagpasabot lang nga dakong buhi ang diwa sa Pasko ug nitumaw ang tinuod nga paglaom bisan sa mga pagsuway nga atong nasugatan.   Ug samtang ugma na ang Pasko mas tataw sa matag usa kanato nga tinuod nga kahulogan sa Pasko ug sa pagpakatawo sa atong Ginoo.

Wa’ man matawo sa atong panahon si Hesu Kristo apan sa matag higayon nga nitabang ‘ta sa uban ug nagmahal sa wa’y sukod, adunay Kristo nga natawo sa matag usa kanato.  Di’ sa mga materyal masukod ang tinuod nga diwa sa Pasko apan anaa sa tinuod nga paghigugma.  Di’ sa mga suga ug ubang daya-dayan apan anaa sa unsa ka kahayag ang atong pagtabang sa mga nanginahanglan.  Di’ sa unsa ‘ta  kabuhong sa grasya ning maong okasyon apan anaa sa atong katakos ug kaandam sa paghatag sa mas nanginahanglan.

Email: [email protected] or [email protected].