Padayon, Ciudad Project!

Daghan ang nalipay niining pagbuhi og balik sa P1.2 billion nga Ciudad Project sa Banilad human kini matanggong og pipila ka tuig.

Nalipay usab ko sa kamahinangpon sa mga opisyal sa Kapitolyo ning proyektoha hinungdan nga ilang gipaminaw ang presentation sa Fifth Avenue Development Corp. atol sa ilang regular session niadtong Lunes kalabot sa kaanindot sa maong proyekto.

Si Bise Gob. Agnes Magpale mismo mipadayag sa iyang kahinangop sa konsepto sa maong proyekto. Kun mao kini, mas maayong lingkoran kini pag-ayo sa Fifth Avenue hangtod mag-groundbreaking.

Kanang gisugyot ni Bokal Gigi Sanchez nga bisitahan og balik ang mga provisions sa kontrata tali sa Kapitolyo ug sa Fifth Avenue “moot and academic” na man na kay pirmado na man kini ug wala nay rason pa nga usbon. Hinuon, mas maayong edukahon pag-ayo sa maong kompaniya ang mga bag-ong bokal aron sila usab makasabot sa konsepto niini.

Sa akong nahibaw-an gamay, kining Ciudad Project usa kini ka lugar diin anha makita ang kustombre ug tradisyon sa Sugbo ug sa mga Sugboanon, usa ka baligyaanan nga ang theme niini mao ang pagkinabuhi sa mga Sugboanon. Nindot kaayo karon nga ang liderato sa Kapitolyo ubos ni Gob. Hilario Davide III ug sa siyudad sa Sugbo ubos ni Mayor Mike Rama magkasinabot ra. Busa naglaum ko nga wala nay babag ang pagpadayon niining Ciudad Project aron duna na kita’y alternatibong kalaagan gawas nianang SM City ug Ayala Center.

Si Michael Dino sa Fifth Avenue nagkanayon sa iyang opening statement atubangan sa mga sakop sa Hunta Probinsiyal sa Sugbo nga ang Ciudad Project magsulti unsa ang Sugbo, sa iyang kinaiya, ug sa iyang kagahapon. Nindot kini nga lugar dad-an sa mga bata aron ipakat-on nila unsa kadato sa kasaysayan ang Sugbo sa samang higayon mag-bonding ang pamilya pinaagi sa pagkaon sa mga lamian unya nga kan-anan nga ang mga pagkaon templa ug luto sa kalungsoran sa Sugbo, mamalit sa mga baligya nga gikan sa kalungsoran ug magsuroysuroy sa mga talan-awon agi’g pagpahayahay. Asa man kita makakita og ingon niini nga proyekto?

Walay rason nga babagan kini tungod sa kanindot sa konsepto niini nga magdugtong sa kagahapon, karon ug sa mosunod nga henerasyon.

Mosuporta ko niini dili lamang tungod sa laing maanindot nga kasuroyan, kun dili tungod sa konsepto niini nga adunay sambog nga edukasyon ug kasaysayan.