Ako lang gihangyo

Pasensya na nga wa ko makapagawas sa akong column niadtong miaging Martes dinhi sa inyong kinaham nga Banat News tungod kay miuli ko sa isla sa Bantayan human maigo sa bagyong Yolanda.

Ako intawon giatiman ang akong pamilya didto labi na sa akong amahan ug mga igsuon nga nabiktima tawon sa bagyo. Ang among panimay ug sa akong mga igsuon nahurot intawon kaguba tungod sa kusog nga hangin ug sa nangatumba nga lubi.

Dako lang akong pasalamat sa Ginoo nga bisan wala na mi kapuy-an didto kay luwas ang tanang sakop sa among pamilya didto sa katalagman. Ako gyong nasaksihan didto ang grabing kadaot nga mugna sa bagyo kay hapit tanang panimay sa tulo ka lungsod sa isla nangaguba ang mga kahoy labi na sa mga lubi nangatumba usab.

Niadtong Domingo nikuyog ko sa GMA Kapuso Foundation nga nanghatag og mga hinabang sa mga biktima sa bagyo, una namong giadto ang Madridejos, sunod sa Bantayan ug ang katapusan sa lungsod sa Sta Fe. Klaro kaayo ang kahinam sa mga tawo nga makaangkon og makaon tungod sa ilang nadangatan dihang nanghatag mig mga relief goods sama sa bugas, delata, noodles, tubig, biscuits ug uban pa. Among nahibaw-an nga ang GMA Kapuso Foundation maoy unang nakahatod og mga hinabang sa lugar maong daghan gyud kaayo ang nalipay sa ilang nadawat.

Dili hinuon tanan ang nahatagan namo’g hinabang sa isla sa Bantayan kay limitado ra ang nakarga sa dala namong truck apan gipasalig sa Kapuso Foundation nga mobalik diha alang sa dugang pang mga hinabang. Dako lang ang akong pasalamat nga way daghang kinabuhi nga nakalas bisan pa sa sitwasyon.

Ako lang panghinaut nga ang gobiyerno mangita gyud og paagi nga matabangan ang tanang biktima sa bagyo sa isla ug dili mogawas ang pagpamolitika kay ang katalagman wa baya mamolitika kay hapit tanan iya mang gibiktima.

Ako lang ning gihangyo kay naa koy mga reklamo nga nadawat nga gipili lang ang gilista nga angayang tabangan labi na sa kabarangayan nga wa mobotar sa mga kapitan. Palihog lang ayaw ninyo kini buhata kay basin baya gabaan mo sa inyong gipanghimo.

Ako lang sab diay personal nga panawagan niadtong malumong kasingkasing nga mga kaila nga tabangan nato ang mga biktima sa bagyo sa isla labi na kadtong nanimuyo sa among barangay sa Baigad, Bantayan , Cebu nga layo kaayo sa lungsod nga posibleng dili kaayo maabtan sa mga hinabang gikan sa mga nagkadaiyang grupo ug sa gobiyerno.

Kami tanan didto nagkinahanglan gyud og mga gamit aron makapabarog balik sa mga pinuy-anan bisan kun payag lang nga kasilungan o kaha katulgan sa mga tawo kay ang uban nagbutang lang og mga sako aron dili mainitan ug mauwanan kay wala nay balay nga kasilungan.

Ako lang diay pasalamatan ang mga tawo nga mitabang sa among mga silingan didto nga nagdala’g ginagmay hinabang labi nang mga estudyante sa tulo nako ka mga igsoon nga pulos nagtudlo sa nagkadaiyang tunghaan sa dakbayan sa Mandaue. Kaninyong tanan salamat!!!

 Alang sa inyong mga reklamo text lang sa 09071678643