Daghan sa atong kabatan-onan karon medyo nawa na sa rumbo sa maayong buhaton nga maatiman ang kaugalingon. Usa sa nahimong hinungdan niini, mao ang kahigpit sa lumba sa panlimbasog sa kinabuhi. Nalimtan ang batakang panginahanglan sa kahimsog sa panglawas. Ilabina sa ubang katilingbanong kalihokan, nga may kalabtanan sa tawhanong pakiglambigit.
Masanay nga ang batan-on karon, mohatag og higayon sa kaugalingon nga makapamalandong. Unsa siya karon sa umaabot kun siya may pagka-edaran na. Dili lang kay magpukos ka sa imong gituhoan nga igo na. Iliraw sa palibot diin kita nabuhi. Basin maawahi ka sa tulin nga kalamboan sa kahimsog. Ang kauswagan sa kinabuhi, kun taligam-an ang lawas mahimong mawad-an og bili.
Himsog ka man sa kuwarta apan ang lawas puwerting masakitona, kilab lang mawa ang bahanding gipanlimbasugan mo sa taas nga panahon. Nga ig-abot sa kaluyahon, wa nay mahandum o mabati nga kalipay kun kita magkaedad na. Hinuon daghan na ang nahigmata, nga naninguha gayud nga mosagop na sa usa sa mopalig-on sa atong kinabuhi nga mao ang balanseng hunahuna ug emosyon.
Gumikan ini, makapiho ka nga mohimsog usab ang imong pisikal, kun apilan mo sa balanseng nutrisyon. Ipahiluna tanan mong buhaton. Ayaw bun-oga ang imong emosyon sa gugmang paturagas nga mopasagmuyo sa way paglantaw sa mahimong kapaingnan. Nga ang giapas mao ang daklit nga kalipay, nga mao diay sinugdanan sa pagsalimuang, mora’g nayabag nga nawad-a’g katagbawan.
Respetuhi ang kabalaanon sa emosyon o gugma, nga matinud-anon sa uyab, di kay sige’g balhin og sakay hangtud hipatiran nga mag-agayay. Magminyo gyud di kay isig lihay kay igo lang magtinilaway, kun pul-an magbuwag kay sige’g away. Makaapektar kini sa lawas, kun kini ang sitwasyon mo kanunay. Wa kay lig-ong pundasyon sa kinabuhi, huyang kanunay samok ang isip, way disisyon nga tul-id.
Himoang modelo ang sagad karong malipayong magtiayon, nakig-unongay sa gugma sa unsa may sungog sa kinabuhi.Nagkahiusa pagdaug uban sa ilang mga anak nga nagmalampuson na usab. Samtang silang ginikanan, wa kamatikod nga luyo sa pag-antos, misamot ang kainit sa ilang lawasnon nga gugma, nga bisan og sila mga edaran na, padayon nag kalami sa ilang seksuwal nga relasyon, daw mga batan-on pa ang dagway kun imong sud-ongon.