Ang kaminyuon usa ka special contract nga pinasubay sa balaod hinungdan nga wa kini expiration date ug dili sab kini mamahimong i-terminate lang sa bana o asawa. Ang pagpatuman sa gobiyerno sa mga lagda ug mga rekisitos sa mga tawo nga gustong magminyo nagpamatuod lang nga usa ka sagrado ang kaminyuon nga kinahanglan gyung protehian sa kagamhanan. Mismo ang atong batakang balaod mikonsiderar sa kaminyuon nga usa ka inviolable social institution nga maoy lig-on nga pundasyon sa usa ka pamilya. Apan unsa bay epekto sa kaminyuon kun adunay rekisitos sa Family Code nga wa nato matuman? Kana nga pangutana ang ato karong tubagon sa atong column.
“Dear Atty. Divine,
Aduna lang unta koy pangutana labot sa validity sa akong kaminyuon. Gikasal mi sa akong bana three (3) years ago pinaagi sa mayor sa among lugar. Nabuntis ko atty. hinungdan nga gidalidali ang among kasal. Tungod kay dinalian, wa na man mi moagi og seminar ug wa na mi mo present og marriage license kay mi-execute lang kami og Affidavit nga kami naglive-in sud na sa lima ka tuig. Ang akong pangutana atty. kun legal ba ang among kaminyuon nga wa man mi marriage license? Mamahimo ba nga magpakasal mi og usab? Hinaut nga imong matubag ang akong pangutana. Daghang salamat. —Fe
Dear Fe,
Ang kaminyuon nga way marriage license makonsiderar kana nga null and void basi sa Family Code, gawas lang kun kamo nakarga sa exemptions sa pagkuha og marriage license ug usa sa exemptions niini ang panaglive-in sa magtiayon sud sa dili mominus lima ka tuig sa wa pa sila magpakasal. Apan kinahanglan nga ang inyong panag live-in tinuod gyud ug dili lang tumo-tumo. Sa imo nga kaso, kun dili tinuod nga naglive-in mo sud sa lima ka tuig hayan makonsiderar nga null and void ang inyong kaminyuon. Hinuon wa may laing maka-question sa validity sa inyong kaminyuon kondili kamo rang duha sa imong bana ug gawas pa, kinahanglan pa sab kining madeklarar sa Korte nga null and void ang maong kaminyuon. Buot ipasabot nga pagkakaron nagpabiling balido ang inyong kasal gawas lang kun adunay usa kaninyo nga modangop sa Korte ug mo-question niini. Samtang kalabot sa imong plano nga magpakasal pag-usab, mamahimo kini ninyong buhaton kay wa may balaod nga nagdili kanato sa pagpakasal sa makaduha nga higayon provided nga with the same partner. Mao man gani kini sagad buhaton sa uban nga human magpakasal sa Civil, magpakasal sila pag-usab sa simbahan busa mamahimo sab kana ninyong buhaton. Hinaut nga akong natubag ang imong pangutana. Daghang Salamat and God Bless.— Atty. Divine
Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag adlaw’ng Miyerkules ug Domingo.