Dakong kawad-on

Insakto na nga usa ka semana human gipusil patay si Jessie Tabanao, ang kanhi spokesperson sa Philippine Drug Enforcement Agency dinhi sa Central Visayas. Apan pabiling blangko ang otoridad kun si kinsa nagpaluyo sa iyang kamatayon.

Na-pressure karon ang kapolisan sa ilang imbestigasyon pagsulbad sa maong kaso. Kini gumikan sa pagka-ilado sa maong biktima kinsa usa usab ka mamahayag.

Mismo ang Cebu City police miadmiter nga maglisod sila sa pag-ila sa mamumuno ni Tabanao. Wala kuno sila’y igong witness nga makatabang kanila pagtumbok sa gunman.

Hinuon ang Task Force Tabanao miingon nga adunay mga text messages nga nadawat ang biktima nga nagsugyot nga adunay kalambigitan sa trabaho ang pagpatay kaniya

Apan wala gitino sa kapolisan kun sa trabaho ba ni Tabanao sa PDEA ug sa radyo ang hinungdan sa iyang kamatayon. Ato lamang paabuton ang dugang resulta sa imbestigasyon sa otoridad.

Daghan ang nagtuo nga dakong kalambigitan ang pagpatay ni Tabanao sa  iyang krusada batok sa druga. Nahibalo na kita kun unsa ka isog si Tabanao sa iyang kampanya batok sa mga nagpayuhot og druga.

Hinuon bisan kun unsa pa man ang motibo sa iyang pagpatay, angay lamang kining kondenahon. Ang iyang kamatayon dako gayud og kawad-on sa ahensiya nga iyang gialagaran.

Naglaum ang publiko nga masulbad sa daling panahon ang kaso sa iyang pagpatay. Hinaut nga mataral sa hukmanan ang mga responsable niini.

Dako gayud nga hagit sa kapolisan kining mga panawagan alang sa  dinaliang kasulbaran niining maong krimen.   Usa kini ka high-profile nga kaso nga angay lamang tutokan sa otoridad aron mahatagan og hustisya ang pamilya sa biktima.