Nagpanikad na ang mga kandidato sa barangay alang sa umaabot nga eleksyon sa paghaylo sa ilang tagi-barangay aron mosustiner sa pagbotar kanila.
May mga kandidato nga mao pay pagsalta o mao pay paglansar samtang ang ubang mga incumbent masaligon na kaayo nga mapili pag-usab .
Kasagaran sa mga incumbent magkombira hapit matag adlaw sa ilang balay aron pakan-on ang ilang silbing mga lider.
Kini aron nga bisan wa pay campaign period apan namundo na nga daan sa kabalaka nga lupigon sila sa ilang mga kaatbang.
Hinuon ang mga botante maoy unang nasayud sa kinaiya sa ilang mga opisyal.
Gikan sa ilang kapitan ug sa mga konsehal niini, may nabuhat bang maayo sulod sa ilang pangatungdanan nga ikaayo sa tanan.
Matinabangon ba ug kugihan, sayon bang duolon, di ba kusog maninghag, maayo ba sa iyang mga silingan ug tanang aspeto sa iyang pagkatawo, pamilya, ug uban pa, maoy timbang-timbangon sa mga botante.
Labaw sa tanan wa bay lama sa mga binuang sa kuwarta nga iya sa goberno nga napalgan sa maong mga opisyal aron matino nga lig-on ang ilang kandidatora.
Ang nausik nga kuwarta sa mga mamumuhis pinaagi sa P10 bilyones pork barrel fund scam maoy angay tan-awon sa botante kun ang pilion nilang kapitan di ba mahilabtanon .