EDITORYAL - Unsa magbabalaod ray kamao?

Makaluluoy  kuno  ang  mga  local government unit (LGU) kun mawa ang  pork barrel sa mga  magbabalaod.

Kay nagtuo man sila  nga kun wa silang magbabalaod, way kapiyalan  ang goberno  sa kuwarta  niini  nga  gastoon  sa  mga  proyekto  sa   kabarangayan.

Mga  proyekto  sa panginabuhi, panglawas. edukasyon, infrastraktura  ug  uban  pa  nga  maoy  batakang  serbisyohanan  sa kagamhanan.

Di  ba anaa  may gobernador  sa lalawigan, may  mga  mayor  sa syudad ug  lungsod  ug  may  mga  kapitan  sa barangay, nganong  di  man  sila  piyalan sa pagdumala sa mga proyekto  nga alang  sa ilang  tagsatagsa ka  lugar?

Kun  P70 milyones  matag  kongresista ug P200 milyones sa senador sa matag  tuig, di ba diay  mahimo  kun ang  maong  kantidad  bahinon  sa  pila  ka   lungsod  sa matag  distrito?

Pagkaanindot na kaha  sa  mga mehoras  sa barangay kun ang maong  pundo  direktamente pa  nga  gipiyal sa LGU.

Kun  may  kawat  mang  mahitabo  di bulto, kay kun may  mokiriw nga  mayor  sa maong  salapi mas gamay-gamay  na lang kun  itandi  sa  gibuhat  sa mga  kongresista ug  mga senador. 

Ang pork barrel  dugay  na  kaayong  gigahin  alang  sa mga  kongresista  ug  mga  senador, unya  dihang  hanas  na  sila, gibulto  sa pagbulsa ang P10 bilyones kapin.

Karong  nasuwayan  na  sa nasud ang  kapintas sa maong tikas,  kinsa  pa may   mopiyal   kanila   nga  adto ra man  nila  kini  iyabo sa ilang  bulsa.