EDITORYAL - Ang pagsurender ni Napoles

Daghan kaayong   nangangha ug nahibulong sa kaisug  ni Janet Napoles  nga imbis sa mga otoridad sa kapolisan o kaha sa NBI nga  maoy direktamenting nangita  kaniya siya motahan, didto  man  siya mosangko sa opisina ni Pres. Aquino.

Misalta ang  mga katahap sa publiko   nga  malagmit  hatagan   siya  og gaan nga silot  kay  imbis  sa  mga  mananakop siya  modangop, didto man hinuon  siya  sa  nagpadakop.

Dinhi namugna ang mga  pagduda  nga tungod kay  giingong  dako siya og gasto sa kampanya  sa  kandidatora sa pagka-presidente  ni Pres. Aquino,  malagmit  mobayad  ang pangulo  sa  utang  na  loob niya ngadto  kang Napoles.

Unya mawagtang ang  iyang  kaisug  sa  kampanya  bahin sa matuwid na daan nga  maoy nabiliban  kaniya  sa  katawhan  sa sinugdan.

Daan  na  nga  giplano  ni Kalihim Leila de Lima nga himoong state witness  si Napoles batok  sa  mga  senador ug kongresista  nga milunod  sa ilang  minilyon ka pesos  nga pork barrel  kunohay sa negosyo niini.

Kunohay lang tungod kay ang dagkong bulto sa maong mga pork tua man sa bulsa  sa mga  opisyal.

Kun  mahitabo kini, di kaha  magbaha  ang  minilyon ka  mga  Filipino  sa karsada aron  sa pagsaway ug  sa pagkondenar sa  kasamtangang administrasyon nga di diay  layo  sa pangagamhanan  sa mga  milabay  nga  presidente?

Sa  ingon niini, makaingon  ang  mga Filipino  nga  asa na man  lang ta paingon  kun  ang mga opisyal  sa kagamhanan  nga   pinili sa mayoridad pulos  diay  hakog  sa  pagbulsa  sa kuwarta  sa kagamhanan.