Bitaw, ngano man tuod nga ang daan man nga bus ang gipasakyan sa mga bata?

Sama sa nangaging katalagman, mao pay atong pagpangandam aron kalikayan ang lain pang dautan nga hitabo. Sama sa giingon sa katigulangan, nga mao pay atong pagpanguros tapus sa usa ka makusog nga kilat ug dugdog, nga unta, mahimo man nga manguros tang daan sa dili pa mokilat.

Ang pagkalunod sa barko, gisundan sa laing trahedya, ang pagka hulog sa bus nga gisakyan sa mga bata. Karon, maoy atong gihunahuna unsaon nga kalikayan ang samang mga panghitabo. Danghan ang mga pangutana, kinsay sad-an, unsay nakaingon sa katalagman, nganong wala kalikayi ang hitabo - nganong walay naka-anticipate ini.

Of course, unsa man ang mga tubag, ulahi na ang tanan. Wala na kitay mahimo sa nahitabo.

Bahin sa bus nga nahulog sa pangpang, daghan ang nangutana ngano nga ang karaan man nga bus ang gipasakyan sa kabataan? Nganong dili man ang mga brand new nga sakyanan nga gihatag sa city hall ngadto sa mga barangay ang gipasakyan sa mga bata? Unsa man diay ni, exclusive use sa mga barangay captain lang ug sa ubang mga barangay officials nga alalay sa city hall?

Wala nay kapuslanan kun unsa man ang mga tubag ini, kay nahitabo na ang tanan. Igo na lang kita sa pagpanghinaut nga dili na mausab ang maong hitabo. Ug igo na lang usab kita sa pagpangandoy nga makagamit usab unta kita sa maong mga brand new nga sakyanan nga gasa gikan sa city hall.

* * *

Sa atong pagsuwat ini, nagpabilin si Presidente Noy sa iyang gibarugan sa dili pag-abolish sa pork barrel, taliwaa sa makalilisang nga anomaliya nga mihugpa ini. Matud niya, ang importante, mao ang pagkontrolar ug paghimo’g mga paagi aron masanta ang pangurakot sa pork.

Nganong hadlok man si Noynoy pag-abolish sa pork barrel? Hadlok ba siya nga malakip ang iyang presidential pork pagka-abolish?  O, hadlok ba siya nga kun iyang i-abolish ang pork, masuko unya kaniya ang mga senador ug kongresista, ug dili na mo-cooperate kaniya pagpalusot sa mga urgent bills gikan sa Palasyo? O, di ba, hadlok siya nga kun iyang ipa-abolish ang pork, dili na makautang og kabubut-on ang mga sakop sa Kongreso, ug dili na unya mo-support sa iyang mga programa? Unsa man say  iyang kahadlokan nga dili na man siya mokandidato sa 2016? Sa ato pa, dili na siya kinahanglan pa nga mamolitika.

Ang public clamor mao ang pagpa-abolish sa pork, aron maka-concentrate na ang mga magbabalaud pagpanday og mga balaud. After all, ang katungdanan sa mga lawmakers mao man ang lawmaking. Ato silang gibutang diha sa Kongreso, aron paggama’g mga balaud … dili aron maka-pork.

Ngano man diay, kinahanglan ba gyud nga ipaagi sa pork barrel aron kita makatukod og mga hospital, tunghaan, kadalanan ug taytayan? Di ba mahimo nga idiritso ni sa DPWH? Di ba diay ta makapalit og tambal ug ubang mga health needs, kun walay pork? Nganong ipaagi man gyud sa mga magbabalaud? Di ba diay sila makagama og balaud kun walay pork?