Kinsa man ang may sala

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Dili tiaw ang gibati karon nga kaguol sa mga kabanay nga ilang sakop sa pamilya naapil sa mga pasahero sa nalunod nga barko nga St. Thomas Aquinas sa 2GO shipping human sa pagbangga sa cargo vessel nga M/V Sulpicio Express Siete sa miaging  Biyernes sa gabii.

Nunot sa maong trahedya sa kadagatan maoy mitumaw karon ang kahingangha sa katawhan nga taliwala sa halapad nga lugar nga ilang giagian sa gihapon nahitabo ang maong panagbangga nga nakaingon sa pagkakalas sa daghang kinabuhi.

Sa maong trahedya nga nahitabo maoy mitumaw karon ang mga pangutana sa katawhan kinsa kun si kinsa man ang may sala nga nakaingon sa maong panagbangga nga nakahatag kaayo og dakong kahasol dili lang sa pamilya sa mga biktima kun dili lakip na usab sa mga pamilya nga nagsalig lamang sa kadagatan ilang panginabuhi.

Matud pa nila nga kun mahitabo ang panagbangga sa mga sakyanan sa kadalanan ang mga imbestigador sa trapiko nga sakop sa kapolisan maoy ilang himoon ang pagsikop gilayon sa mga drayber nga hingtungdan.

Nunot sa maong pagdakop maoy ilang himoon ang pag-impound sa mga nalambigit nga sakyanan ug  ang mga drayber nga nalambigit sa panagbangga temporary silang mabalhog sa detention cell.Kun mahitabo ang panagbangga sa maong duha ka sakyanan sa kadalanan matataw man nga mao lamang ang maepektohan ang nalambigit nga pasahero ug dili na kaayo makahatg og kahasol sa panginabuhi sa ubang mga tawo.

Sa panagbangga sa duha sakyanan sa kadagatan dili lang ang pamilya sa nahimong biktima nga pasahero ang naepektohan  kun dili lakip na usab ang mga molupyo sa kabaybayonan nga nagsalig lamang sa ilang panginabuhi sa pagpanagat ug pagpanginhas og mga kinhason sa hunasan apan  subo nga palandongon kay  dili man dayon matumbok kun kinsa ang manubag sa nasinati nga kadaut ug mga kahasol.