Daghan ang nakadayeg sa bayanihong gihimo sa mga mananagat sa dakbayan sa Sugbo nga naghugop sa pagluwas sa nanglutaw sa kadagatan ang mga bata ug tigulang nga pasahero nga maoy nagluwan sa nalunod nga barko sa kadagatan sa dakbayan sa Talisay.
Ang maong mga mananagat sagad kanila taga dakbayan sa Talisay ug pipila usab mga mananagat gikan sa lungsod sa Cordova nga wala gayod pagbiya sa naandan nilang panginabuhi nga pagpanagat tungod kay nagdali man kini sa pag-adto sa dapit nga nalunoran sa barko aron sa pagluwas sa mga pasahero.
Matud pa nila nga tungod kay alas 9 pa sa gabii ang maong mga mananagat wala pa gayod makakuha og isda sa ilang pagpanagat wala na man matigayon ang ilang pagpanagat kay mao man ang ilang gihatagan og pagtagad ang pagluwas sa mga kinabuhi nga nag-ungaw sa kamatayon.
Nabalda ang ilang pagpanagat nga ang isda nilang makuha alang unta sa ilang tagsa-tagsa ka pamilya apan wala nilang igsapayan nga wala makakuha og isda sa ilang pagpanagat sanglit nakaluwas man sila og daghang kinabuhi.
Sa kasayuran nga nahipos nga ang barko nga St. Thomas Aquinas sa 2GO Shipping ang giluwanan sa 692 ka pasahero ug mga crew nga migikan alas 12 ang takna sa Biyernes sa udto gikatakda na untang modunggo sa pantalanan sa dakbayan sa Sugbo alas 9 ang takna sa gabii. Ang pipila ka mga crew sa maong barko miingon nga nagkadukaduol na sila sa pantalan sa pagdunggo tungod kay ang uban nga mga pasahero manaug man sa pantalan sa dakbayan sa Sugbo.
Adunay pipila kanila nga manaug ug mobalhin kini og laing barko nga mobiyahe paingon sa Bohol, Negros Oriental, Iloilo, Leyte ug paingon sa Samar apan dihang mimando na ang kapitan ngadto sa iyang mga crew nga mangandam sa ilang pagdunggo kalit lang kining milugapak dihang naigo sa pagdasmag sa laing barko nga M/V Sulpicio Express 7 nga gipanag-iya sa Sulpicio Shipping Lines nga kalit lang mibangga niini.