Kun ato pang gipadayon ang kang

Imelda nga Green Revolution …

Bitaw, kun ato pang gipadayon ang kang Imelda nga Green Revolution ug Tree Planting ni Marcos … dili unta tingali ingon ini kagrabe sa baha’, lunop, ug pagdahili sa yuta nga karon atong nahiaguman, ug dili usab unta kita maproblema sa kamahal sa abot gikan sa kayutaan.  

Kun ato pang gipadayon ang nuclear energy plant sa Bataan, dili unta kita karon ma-problema sa enerhiya.

Kun ato pang gipadayon ang Kabuhayan program, dili unta kita maproblema karon sa  kahinguhaan o livelihood sa mga molupyo, labi na sa ka-barangayan ug kahilitang dapit sa nasud.

Kun ato pang gipadayon ang Masagana 99 program, nagpadayon usab unta ang atong pag-export sa bugas humay, ug dugay na usab unta kitang mihunong pagpamalit og  bugas gikan sa gawas.

Kini, ug uban pang mga kaugmaran sa nasud nga wala nato padayona … apan wala kita’y gipuli nga mas maayo. Unsa may atong gipadayon?

Ang corruption, ang smuggling, ang tax evasion, pork barrel, ubp. Unya, mangutana ka nganong pobre gihapon ta? Pagkasayang sa Edsa Revolution!

* * *

Magpili na usab kita’g mga opisyales sa barangay. Intention sa balaud nga apolitical, non-political ang pagpili sa mga barangay officials. Apan, sukad pa sa unang mga panahon, samtang dili sila magdala og partido panahon sa kampanya, klaro kaayo nga gipaluyohan ug gisuportahan, lagmit gigastoan pa sila sa mga politiko.

Sa mga barangay, ang mga mangutana, kinsa ang suportahan ni Mayor Mike Rama, kinsa ang sabakon ni kanhi Kongresista Tomas Osmeña. Non-political? Both sides maningkamot gyud nga mas daghan sa ilang mga alalay ang mudaog aron ma-capture nila ang pagka-ABC president nga makalingkod sa city council.

Unya, naa pay SK nga kun makuha ni Mayor Rama ang presidente ini, uban sa ABC president, kadungagan og duha ang iyang sakop sa konseho.

Mao nga bisan og dili unta kini bugno sa politika, kining umaabot nga barangay election, alegre ni … kay maisip gihapon kini nga bugnong lugaynon tali sa Team Rama ug BO-PK. Non-political?

Ug alang usab sa mga kandidato, kinahanglan mosandig gayud sila’g political party. Sa ato pa, Liberal Party batok UNA. Kay lisud kaayo, o imposible kaayo kun mag-independente ka. Gawas og daghan kaayo kag kwarta igasto sa kampanya ug ipamalit sa mga botante.

Pastilan, mora man og dili na mawagtang kining vote buying. Nahimo na kining dakung bahin sa atong kultura ug kinaiya.

Pirme tang maghisgot og change … kausaban. Hangtud nga dili ikaw mag-usab sa imong kaugalingon, kay maghuwat kang mousab ang Presidente, ang mga Senador ug Kongresista,  mga Gobernador ug Mayor … dili gayud nato makab-ot ang gikinahanglan kaayo nga change.

Busa, ang tanan anha magsugod nimo.  Atong sugdan karong barangay election.