Ang kaminyuon usa ka special contract tali sa magtiayon nga way expiration date. Dili kini sama sa ubang kontrata nga mamahimo lang i-terminate diha-diha kun magkasabot lang ang matag partido. Ang kaminyuon usa ka lifetime commitment ug usa ka sagrado nga butang. Apan unsa bay angayang buhaton kun magbuwag ang magtiayon ug ang amahan hikawan na sa pagpakigkita sa iyang anak? Kana nga pangutana ang atong tubagon karon sa atong column.
Dear Attorney Divine,
Good day!Usa ko sa magbasahan sa imong column sa Banat News. Misulat ko nimo Atty. kay naa koy dakong problema . Ako diay si Mr. L. 25 anyos minyo ug naa magpuyo sa Subangdaku, Mandaue City. Ang akong problema mahitungod sa akong asawa. Magduha na mi ka tuig karon sa pagpuyo isip bana ug asawa. Kasado mi ug duna mi usa ka anak nga babaye nga one year na ang pangidaron. Duna mi panaglalis aning akong asawa Atty. semana na ang milabay. Naghusay mi sa balay sa iyang iyaan kay tua na man siya didto nagpuyo. Verbal ra ang among panaghusay ug midesisyon akong asawa nga makigbuwag nako Atty. Gani gihatag niya pagbalik iyang singsing ngari nako. Naguol ko Atty. ug puno sa kalibog ug ang akong mga pangutana mao ni: 1. Pwede ba nako makuha or madala, masuroy man lang bisag kausa sa usa ka semana akong anak Atty.?2. Nagsustento ko aning akong anak karon, maka-demand ba og dakong kantidad akong asawa?Pila man pud ang minimum ug maximum nga kantidad Atty.? 3. Kining iyang iyaan ug uyuan nga magsige og apil-apil ug panghilabot pabor sa akong asawa, duna ba ko'y igong ika-reklamo batok nila?4. Kung moadto ko sa ilang balay, pwede ba sila makababag nako ug dili makapasulod nako? Duna ba silay igong basihan? 5. Kung iyang ipalayo kanako ang among anak, duna ba koy igong katungod nga mopasaka ug kaso? Unsa man pud nga kaso Atty.?Daghang salamat Attorney ug more power sa imong column ug sa Banat News.— Mr. L
Dear Mr. L,
Salamat sa imong pagbasa kanunay sa Banat News ilabi na sa Legal Corner. Sa imong unang pangutana, isip usa ka amahan, aduna kay katungod nga mobisita ug makig-uban sa imong anak, klaro ug tataw kana sa atong balaod. Apan mas maayo sab nga makigsabot ka sa imong asawa sa schedule sa imong pagbisita ug sa imong gusto nga isuroy nimo ang bata aron di mosamot ang inyong away. Sa imong pangutana kun maka-demand ba og dakong sustento ang imong asawa ug kun pila man gyud ang minimum ug maximum nga sustento ang angayang ihatag, ang atong Family Code sa Article 194 nagkanayon nga ang Support naglakip sa kinatibuk-ang panginahanglan o sustenance, pinuy-anan, senina, tambal, education, transportation ug uban pa. Ang kantidad sa Suporta basi sa Article 201 sa Family Code nagdepende sa pilay makaya sa mohatag sa support ug kun pila sab ang panginahanglan sa hatagan. Buot ipasabot , nga way kantidad nga gitakda ang atong balaod kun pila ang angayang isustento sa imong anak kondili mangdepende kini kun pilay iyang panginahanglan matag buwan ug kun pila sab ang imong kaya nga mahatag matag buwan. Samtang kanang mga uyuan og iyaan nga magsige og panghilabot sa inyong kaminyuon wa gyud tay laing mahimo niana gawas lang sa paghangyo kanila sa dili pagpanghilabot sa inyong marital affair kay usahay mao nay makapasamot sa inyong panag-away. Mas maayo sab nga imong sultian ang imong asawa nga angayan ninyong husayon ang inyong problema inay modesisyon dayon sa panagbuwag. Kun di ka pasudlon sa uyuan ug iyaan sa imong asawa kun moadto ka sa ilang panimalay ayaw lang sab pagpamugos kay isip tag-iya sa panimalay aduna man silay katungod nga di mopasulod kanimo ug kun mamugos ka sa pagsud sa ilang pinuy-anan basin unya og ikiha ka og trespass to dwelling. Samtang sa imong katapusang pangutana in case ilang ipalayo kanimo ang bata aduna ka bay katungod nga mokiha sa imong asawa? Ang atong Family Code nagkanayon nga ang bata nga nagpangidaron og ubos sa 7 anyos kinahanglan ang custody niini adto gyud sa iyang inahan. Karon sa imong sitwasyon one (1) year old pa ang bata so klaro kaayo nga ang inahan gyud ang adunay katungod nga mo-custody niini. Ang imo ra gyud mahimo niini kun hikawan ka sa pagduol sa bata mao ang pagdangop sa Korte aron sa pagpangayo sa imong katungod sa pagbisita sa bata. Hinaut nga akong natubag ang imong mga pangutana. Daghang Salamat and God Bless! — Atty. Divine