Mr. Barangay

Duna koy nadawat nga reklamo bahin sa mga pagbaha diha sa barangay Tisa dakbayan sa Sugbo nga dugay nang matagamtaman labi na sa Sta. Teresita Village nga maoy grabing apektado kay halos molapaw na sa tawo ang tubig baha kun kusog kaayo ang uwan. Sa akong pakighinabi sa mga apektadong mga molupyo ilang gipahibawo nako nga ila nang napaabot sa mayor ang problema ug sa ubang konsehal sa siyudad kay wala pa gyud matagad sa barangay ang ilang problema. Sa akong nahibaw-an gikan sa mga molupyo sa lugar nga duna nay minilyong salapi nga gahin niini alang sa proyekto sa drainage system sa lugar. Ang pangutana karon asa naman ni nga kuwarta nganong wala man mapatuman ang proyekto? Dili ba kaha tipik ni sa gikwestiyon sa Commission on Audit nga gahin sa siyudad sa Sugbo. Angayan tingaling susihon kini pag-ayo basin kun napunta ang gahin sa dili maayong kamot. Akong giadto ang kapitan sa Tisa nga si Kapitan Teresita Cabulao sa iyang buhatan aron unta pagpangutana kun unsay rason nganong wala mapatuman ang maong proyekto apan mibalibad kini pinaagi sa iyang secretary. Giingnan lang mi nga si Konsehal Eddie Cabulao bana sa kapitan maoy moatubang namo apan pabalikon lang mi kay wa diha sa barangay hall. Nagkatawa kong naghunahuna kun wa moatubang namo si Kapitana Cabulao, kinsa man diay kapitan siya o iyang bana? Pagkatoytoy.....

Brgy Natimao-An, Carmen, Cebu

“Nagreklamo na gyod mi sa among karsada diri sa Upper dapit kay grabe na kaguba giabunohan ni sa wala pa ang election kay aspaltuhon kuno pero hangtod karon wala gyod atimana.”

Brgy Jubay, Liloan, Cebu

“Mibalik na sab ang mga pusher diri sir nadakpan na man ni sila sa una pero nakagawas man hinuon hinungdan nga baligya na sab og usab.”

Brgy Poblacion, Sogod, Cebu

“Naay mga tawo diri namaligya’g illegal nga drugas nga wala gyod mabadlong kay apo ra sa usa sa mga opisyal namo diri sa barangay unya mga polis wa say gihimo ani nga problema.”

Brgy Basak, Lapulapu City

“Ngano man ni diri sa among lugar nga kanunay ra man mag brownout ug mawala ang agas sa tubig purhisyo kaayo namong nagtrabaho og online hinaut nga mahatagan kini’g pagtagad.”

Brgy Suba, Asturias, Cebu

“Tabangi tawon mi diri sir Jun nga mapaabot sa kapolisan ang problema sa shabu diri sa amoa kay hastang mga tiguwang gitripan pa gyod sa mga adik hinaut ang pdea ang moaksyon ani.”

Brgy Poblacion, Alcoy, Cebu

“Ang among mga opisyal sa barangay ug kapolisan wala man gyod kabadlong aning estambay nga sige’g syagit aning basketball court bisan kun lawom nang gabii nagpakabuta bungol ra man tawun ni sila.”

Brgy Bahac, Liloan, Cebu

“Ang karsada diri padung sa Sambag San Vicente kay dagko naman kaayo’g mga lungag delikado na kaayo sa mga motorista maayo unta’g ayuhon kini sa mga opisyal sa lungsod.”

Alang sa inyong mga reklamo text lang sa 09071678643